Ka jingbuh pulit ha NEHU dei ka bym ju jia mynno mynno ruh bad kaba ym lah pdiang: MeTTA

Shillong, Ïaïong 29: Ka Meghalaya Tribal Teachers’ Association (MeTTA) ha ka sngi baar ka la pynpaw ba ka jingbuh ïa bun ngut ki pulit hapoh ka campus jong ka North Eastern Hill University (NEHU) ka dei kaba ym ju jia mynno mynno ruh bad kadei ruh kaba ym lah ban pdiang satia.
U President ka MeTTA u Prof Desmond L Kharmawphlang ha ka jingkren u la ong, “Kane ka kam ka la nang kham heh hadien ba ka la paw ba ka don ka jingrung jong ki pulit hapoh ka university ha kaba khlem da don ka jingïasyllok bad ki bor pynïaid ka university ne wat ban pyrshang ban ïoh ïa ka jingai jingbit ban rung shapoh ka campus.”
U la ong ba ka MeTTA ka la ïohpdiang ka jingshah phone na kiba bun ki samla pule kiba la pynpaw ïa ka jingtieng jingsyier hadien ka jingwan tur kynsan jong ki pulit bad kiba la ïaid ruh sha ki bynta bapher bapher jong ka campus da kaba pyni ba ki la long kiba la kreh ban ïakhun bad kiba la pyni ruh ïa ka dak ba ka jingdon ki pulit kan long kaba lah ban neh slem, ki la wanrah ruh da ki truck ki kali kiba la don da ki tiar siat bad kiwei kiwei.
“Ka jingdon bun ki pulit da kaba pynpaw ba ki wan hadien ba ka la don ka jingshah kynnoh ba shah shoh u nonghikai ka long kaba ym ju jia koit bad kaba ym lah ruh ban pdiang bad ka jingmih na kane ka long tang ka jingtieng bad ka jingpynbun ka jingmut jingpyrkhat hapdeng ka kynhun jong kiba bun hapoh ka university kaba kynthup ïa ki samla pule, ki nongtrei bad kiwei pat kiba ai ki jingshakri bapher bapher,” pynpaw u Prof Kharmawphlang da kaba bynrap ba ka sawdong sawkun jong kane ka jaka pule ka la dap da ki jingshah pynthut haduh katta katta ha kaba kiba bun ki tnat pule bad ki kam administrative ki la shah ktah.
U Prof Kharmawphlang u la ong ba ka MeTTA ka la pynrem jur ïa kane ka jingpyni jong ki pulit kaba khlem da la khmih lynti ba kan wanjia hapoh kane ka jaka pule.
“Halor kane ka jingjia, ka MeTTA ka ïohi ba kane ka dei ka kam jong ki katto katne ki riew shimet bad ki party kiba don jingthmu ban myntoi shimet kiba la wanrah ruh da ki agenda ba bun rukom. Ai ba kine ki puppet handler dei ban maham naba ka MeTTA kan ym lah ban shah ïa kum kine bad ka la long ruh kaba la khreh ban leh eiei ïa kum kine kiba wanrung ha ka jaka pule,” u la bynrap.
Shuh shuh u la ong ba ka MeTTA, NEHU ka angnud na ka bynta ka bha ka miat jong baroh ki riewshem phang bad ki dkhot kiba don ha university, nangta ka jingdonkam ban don ka suk ka saiñ lyngba ka jingburom ba mar kylliang bad ban bat ruh ïa ka aiñ (Act), ki rukom pynïaid bad ki kyndon jong ka NEHU bad ban pynïaid shaphrang ki kam pule.
“Ka MeTTA ka angnud ban bteng na ka bynta ka bha ka miat ka university bad baroh ki dkhot jong ka, kiba dei ki trai ri trai muluk jong ka jylla Meghalaya,” u la bynrap.
Ha kajuh ka por ka MeTTA ka kyntu ïa ka jingdonkam ban bat ïa ki kyndon jong ka established codes of conduct bad protocol kiba ïalam sha ka jingïadei ha ki kam hapdeng ka jaka pule bad ki bor sorkar bad kaba kongsan ka dei ka jingithuh ïa ka jinglong laitluid ne autonomy ha kaba baroh ki skulbah ki ïoh kaba long katkum ka jingthoh bad ki jingleh ïa ki kam.