Ym ailad ki paid Mawlai ïa u Bah Teibor, pynbor ban ïakhun beit kum u kyrtong shimet

Shillong, K’Lyngkot 04 : Ki nongkyrshan jong u Bah Teibor Pathaw kiba kynduh lang ha ka janmiet sngi Saitjaiñ ha Mawlai Nonglum da kawei ka sur ki la pynbor ba u dei ban mih aireng beit kum u kyrtong shimet bad iehnoh ïa ka NPP ha kane ka elekshon MDC kaba la buh ban long ha ka 21tarik u Rymphang mynta u snem.
Ha kane ka jingïalang kaba la khot da ka Mawlai Social Service Organisation (MSSO) baroh ki nongkren na man la ki dong jong ka Mawlai constituency ki la pynsngew ba jan baroh ki paidbah nongthep vote ki kren thlia lut lada u Bah Teibor u mih ban aireng biang na ka tiket NPP ha kane ka elekshon MDC.
“Ha ka elekshon MDC ha u 2019 i la jop kum u kyrtong shimet, mynta ka kynti ruh ngi kwah ba i Bah Teibor in ïakhun biang kum u kyrtong shimet,” ong uwei na ki rangbah haba kren ha katei ka jingïalang.
Da kaba kyrshan ïa ka jingkren jong une u rangbah, baroh ki nongkren na kiwei ki dong ruh ki la kyrshan lang ryngkat ka jingkyntu ba lada u mih ban aireng kum u kyrtong shimet ka jingïakhun ka kham suk.
Na ka liang u Bah Moris Lyngdoh haba shim kyllum ïa baroh ki jingkren na ki nongkren ha kane ka janmiet u la ong, “Mynta ka janmiet ka sur u paid mawlai ka ong ba u Bah Teibor u dei ban ïakhun kum u kyrtong shimet.”
Shuh shuh u la ïathuh ruh ba hadien ba u Bah Teibor u la pynbna ba un ym ïakhun shuh ïa kane ka elekshon MDC na ka liang ki nongïalam ba hakhmat ki la kynduh kyrkieh bad mardor ki la pan jingshai na u. U la ïathuh ruh ba dei hadien ka jingïakren kaba slem ba na ka liang u Bah Teibor u la kular ban ïakhun biang tangba ki khlem ïa kren pat na kano ka party ban ïakhun.
U ong ruh ba dei tad haduh kane ka janmiet ba ki paidbah ki la ïoh ban pynsngew markhmat ba kim kwah shuh ba un dang ïakhun na kajuh ka party kaba u ïakhun ha ka elekshon MLA hynrei ba u dei ban mih beit kum u kyrtong laitluid kata kum u kyrtong shimet.
Ha ryngkat ka jingdonlang kiba bun ki paid nong Mawlai na ka liang u Bah Teibor u la ong ba u pyndem ha ka bor jong u paidbah ka Mawlai bad u kloi ruh ban mih ban aireng ha kane ka elekshon kum u kyrtong shimet.
“Nga pyndem ha ka bor jong phi u paidbah bad nga kloi ban ïakhun ïa kane ka elekshon MDC kum u kyrtong shimet,” u la ong. Mar ïa pynbna u Bah Teibor ïa kine ki kyntien ki paidbah kiba poi sha kane ka jingïalang ki la risa lut shar ryngkat ka thap kti bad kynhoi da ka jingkmen ba une u MDC ba mynta ka Mawlai u la mynjur ïa ka jingkyrpad jong ki paidbah ka constituency na bynta kane ka elekshon MDC.
Lah ban kdew hangne ba u Bah Teibor u bat mynta kum u Executive Member ka tnad Land bad Building Byelaws jong ka Khasi Hills Autonomous District Council.