Shillong, Naitung 12: Ki thei ïalehkai jong ka Lawei Smit SC ki la lah ban pynliem ïa ka Mawkriah West SC haduh 6-0 kol ban kyntiew ïa ka namjop kaba nyngkong jong ki ha rynsan ïalehkai jong ka lympung Shillong Sports Association’s Women’s League kaba la pynlong ha Third Ground, Polo, hynne ka Sngi Balang.
Haba phai sha kawei pat ka jingïalehkai, kaba hapdeng ki kynhun napoh ka Group A, la ïoh ban sakhi ba ki thei ka Kick Start Football Coaching Centre ki la ïoh ban khur ïa ka namjop salit da 1-0 kol pyrshah ïa ka Umpling SC.
Ha ka jingïakhun kaba ar, ki thei jong ka Lawei ki la trei shitom naduh kaba sdang jong ka lympung, ha kaba ka Innocia Tympuin ka la ïoh ban pynkhih ïa ka jar kaba nyngkong, hadien ba ka thei apkol jong ka Mawkriah West ka la kynjat ïa ka bol kaba la wan beit sha katei ka thei lehkai jong ka Lawei No. 17.
Hadien kane, ka kynhun ka la ïoh ban pynbud sa ïa ki ar kol shuwa ban khylliap ïa ka kylla step, lyngba ka Fedilia Lamare (28′) kaba la ïoh ban pynurlong hadien katto katne ki kabu ba la lait. Tang hadien shi minit ka Airilang Khongsit (29′) ka la ïoh ban pynrung jlang ïa ka kol kaba lai ban pynlong ïa ka kynhun ban ïoh lamkhmat haduh 3 kol ha kaba kut jong ka kylla step.
Nangta ka Barikor Kurbah ka la ïoh ban thep sa ïa ka kol kaba saw ha ka 43rd minit bud sa ka kol na ka Khongsit (46′). Hadien kane ka jingïakhun ka la sdang ban kylla bad na ka liang jong ki thei ka Mawkriah West ki la pyrshang katba lah ban thawlad da kumno ban ïoh pynkhihjar dei tad haduh shuwa ban khylliap ïa ka jingïalehkai ba ka Jidalin Tympuin ka la ïoh ban thep sa ïa ka kol kaba hynriew na ka bynta ka Lawei.
Haba phai pat sha ka jingïalehkai kaba nyngkong, ka kol kaba la thep da ka Daiamon Makroh ha ka minit ba 16 na ka bynta ka Kick Start ka la ïarap ïa ka kynhun ban kyntiew ïa ki lai point ha ka miej.
Ka Kick Start ryngkat bad ka Lawei mynta ki la ïoh ban khur mar 4 poiñ, hynrei ka Lawei ka la ïoh ban bat kyrdan ba lai katba ka Kick Start ha ka kyrdan ba saw namar ka jingïapher kol (-3 and -8).
Ka jingïalehkai mynta ka sngi kan long hapdeng ki kynhun napoh ka Group B. Ha ka por 2:30 jan miet, ha kaba ki thei ka Kharang SC kan aireng ïa ka Maw U-Tieng SC bud sa ka jingïalehkai hapdeng ka Iasnohktilang Madanrting FC pyrshah ïa ka Synroplang 77 ha ka por 4:15 jan miet.
