Jowai, Jymmang 04: Ka kynhun ïalehkai jong ka Ummulong CC kala khur ïa ka jingjop da 6 wiket ha ka jingïalehkai pyrshah ïa ka Young Lad’s CC ha ka lympung District Cricket League 2025 bala pynïaid daka West Jaiñtia Hills District Cricket Association (WJHDCA) kaba la long ha ka sngi Saitjaiñ (03 tarik u Jymmang, 2025) ha Mini Stadium, Khliehtyrshi.
Hashwa ka jingïakhun la rai ban pynduna ïa ka ober na ka 35 sha ka 20 over kaba la sdang naduh katei ka sngi haduh ba kut jong ka League na ka daw ka jingpynthut jong u slap kaba la jia la jan man ka sngi bad ki Teams baroh ki la mynjur ïa kane ka jingpynbeit thymmai na ka liang ka Association.
Ka jingïalehkai ha katei ka sngi, ïa ka jingkynting toss la jop da ka Ummulong CC kaba la kam trai ban bol nyngkong. Haba shimti ïa ka pali tied ba nyngkong ka Young Lad’s CC ka la lah ban kamai 110 ron bad liem 7 wiket haduh kaba kut jong ki 20 ober.
U Dathrangki Pariat (C) u la long uba seisoh bha napdeng ki nongtied jong ka Young Lad’s CC da kaba kamai marwei 46 ron na ki 46 bol kiba u la bynrap da kawei ka Six (6) bad 4 tylli ki Fours (4s). U Wellmanson Passah (C) bad u Heimonlang Lyngdoh, nongkawang bol jong ka Ummulong CC ki la ïoh ban khur mar 2 wiket na ki 4 ober.
Ha ka pali tied ban beh ïa ka thong ki nongtied jong ka Ummulong CC ki la lah ban pynjop da kaba kynjoh 111 ron ba ka donkam ha ka ober kaba 17.5 bad khyllem tang 4 wiket kaba la pynlong ïa ka kynhun ban jop ïa ka jingïalehkai da 6 wiket.
Napdeng ki nongtied jong ka Ummulong u Aaron Lamare u la lamkhmat da kaba kamai 48 ron (khlem out) na ki 38 bol kiba u la bynrap naki ar tylli ki Six (6) bad 6 tylli ki Fours (4s). U Maremdor Sutnga, u nongkawang ball jong ka Young Lad’s CC u la ïoh ban pynhap 2 wicket na ki 3.5 ober
Ïa ka nam Man of the Match la khur da u Heimonlang Lyngdoh u nongïalehkai jong ka Ummulong CC uba kamai 22 ron ha ka tied bad ïoh ban pynhap 2 wiket.
Ka jingïalehkai ha ka sngi nyngkong (05/05/2025) kan long hapdeng ka Khimusniang SC pyrshah ïaka Evergreen SC&CC naduh ka por 8 baje shiteng mynstep.
