Lahduh ka Mawsynram bad ka Sohra ha ka (L) Benjamin Diengdoh Memorial U-16 Inter School CT 2025

Saitsohpen-Sohra, Jymmang 04: Ka Mawsynram Cluster bad ka Sohra Cluster (A) ki la ïoh ban rah ïa ka nam lahduh ha ka lympung ïalehkai kriket kaba la tip da ka (L) Benjamin Diengdoh Memorial Under-16 Inter School Cum Cluster Cricket Tournament 2025 (Boys & Girls).
ïa kane ka lympung la pynlong da ka East Khasi Hills Cricket Association [EKHCA] ha madan Pynshadkhurai, Saitsohpen, Sohra.
Ka long kaei kaei kaba sngewsih na bynta ki khynnah ïalehkai jong ka Pongtung Cluster shynrang bad kynthei, ha kaba baroh ar kynhun kiba la poi sha ka final kim shym la lah ban poi sha ka thong.
Ka Mawsynram Cluster ka la lah ban pynliem noh ïa ka Pongtung Cluster da 45 ron ha ka final ban rah ïa ka burom lahduh jong ki kynthei, katba ki khynnah shynrang jong ka Sohra Cluster (A) ki la jop da 4 wiket ïa ka Pongtung Cluster.
Haba phai sha ka final jong ki kynthei, ka Mawsynram Cluster ka la kam trai ban tied nyngkong hadien ba jop ïa ka jingkynting pisa (toss) bad ki nongtied ki la ïaineh haduh kaba kut jong ka 20 ober ba la mang ban kamai 106/3.
Ka Eliza Lyngdoh ka la long kaba kongsan tam ha ka tied da kaba kamai 58 ron marwei naki 46 tylli ki bol. Dei tang ka Saramanbha Kongsit kaba la seisoh ha ka bol na bynta ka Pongtung, da kaba khur 2/20 naki 3 ober.
Watla ka Pongtung Cluster ka la tied pyndep ïa ka 20 ober hynrei ki nongtied kim shym la lah ban pynpoi sha ka thong, da kaba sahkut tang 61 ron bad khyllem 4 wiket (ka Sweetcy khongtiang ka la kamai 13 ron naki 23).
Nalor ba shen skhem ha ka tied ka Eliza Lyngdoh ka la ïoh ruh ban khur 2/9 naki 3 ober ha kane ka jingïalehkai kaba la pynlong ïa ka ban khur ïa ka nam Player of the Match bad kumjuh ruh ïa ka nam ‘Player of the Tournament’.
Ha ka final jong ki shynrang ka Pongtung Cluster ka la shah khanglad noh da tang 49 ron naba khyllem baroh 10 wiket naki 20 ober, u Mewanshailang Khongmawloh u la noh synñiang 21 ron naki 27 bol. U Pynshngain Sohkhlet jong ka Sohra Cluster u la khur haduh 4/8 marwei naki 3 ober.
Watla u Jebenti Lyngdoh (uba la khur 2/11 naki 3 ober) u la pyrshang katba lah ban khanglad hynrei ka Sohra Cluster ka la pyndep ïa ka kamram tang haki 12.1 ober ban kamai 50 ron bad khyllem 6 wiket. U Dathew Sohkhlet u la kamai 12 ron naki 27 bol.
ïa ka nam Player of The Match la khur da u Pynsngian Sohkhlet katba ïa ka nam Player of The Tournament la ïoh da u Mewanshailang Khongmawloh.
Ha kane ka sngi la ïadonlang ki nongkitkam jong ka EKHCA ryngkat ki bahaïing jong i Late Benjamin Diengdoh kynthup ïa i Kmie bad ki Meisan baroh.