Jowai, Jymmang 04: Ka SCA ‘B’ kala ïoh ban khur ïa ka jingjop da 2 wiket pyrshah ïa ka SWKHDCA haka jingïalehkai jong ka lympung Under-16 Boys Inter District Cricket Tournament 2025 (Zone-1) kaba la long ha ka sngi saitjaiñ (03 tarik u Jymmang, 2025).
Ïa kane ka lympung la pynlong daka Meghalaya Cricket Association (MCA) bad la pynïaid ïa ka daka West Jaiñtia Hills District Cricket Association (WJDCA) ha Madan Thad, Mukhla Mission,West Jaiñtia Hills District.
Haba phai sha ka jingïalehkai kaba la long ha katei ka sngi, ïa jingkynting pisa (toss) la jop da ka SWKHDCA kaba la kam trai ban tied nyngkong. Kane ka kynhun ka la lah ba kan kamai 126 ron na ki 43 ober bad khyllem 9 wiket.
U Phrangborlang Syiemlieh (C) ula long uba seisoh tam napdeng ki nongtied jong ka SWKHDCA da ka ba kamai marwei 50 ron na ki 117 bol kiba u la bynrap naki 5 tylli ki Fours (4s). U Arav Baraily, u nongkawang ball jong ka SCA ‘B’ u la ïoh ban pynhap 3 wiket na ki 10 ober.
Haba wan ban beh ïa ka thong, ka SCA ‘B’ ka la lah ban pynthikna ïa ka jingjop da kaba kamai 130 ron tang naki 27.1 ober bad hap 8 wiket. Lah ban ong ba kane ka jingjop ka dei kaba la ai mynsiem da jingïalehkai kaba kyrpang na u Suraj Chettri uba la noh synñiang marwei haduh 94 ron kiba u la kamai na ki 75 bol. Ha kane ka jingïakhun u Suraj u la bynrap da kawei ka Six (6) bad 12 tylli ki Fours (4s). U Gillford Iawphniaw, nongkawang ball jong ka SWKHDCA u la ïoh ban khur 4 wiket na ki 4 ober.
Kane ka jingïalehkai ka dei artad kaba khadduh haka League Stage jong ka Under-16 Boys Inter District Cricket Tournament 2025 (Zone-1). Katkum ka jingïoh kamai point na ka Group A, ka SCA ‘B’ ka ba jop lut baroh ki jingïakhun ka la wan kyrdan ba nyngkong ha ka Points Table da ka ba ïoh 8 point. Nangta bud sa ka EJHDCA ha ka kyrdan ba ar da ka ba ïoh 5 Point.
Haba phai sha ka Group B, ka RBDCA ruh ka ba jop lut baroh ki jingïakhun ka la bat hi dalade ïa ka kyrdan ba nyngkong da kaba ïoh 6 point katba ka EKHCA ka la wan ba ar da ka ba ïoh 4 point.
Na ka Zone-1 ki Teams ba ïoh ban rung sha ka Semi Final ki dei ka SCA ‘B’ kaba dei ka top team na Group A, ka RBDCA ka ba dei ka top team na Group B bad ka EKHCA ba ïoh best NRR. Na ka Zone-2 pat ka Team ba ïoh ban rung sha ka Semi Final ka dei ka TDCA ka ba long ka top team.
Ka SCA ‘B’ kan ïakhun pyrshah ïaka EKHCA ha ka Semi Final ka ban long ha ka Zone-1 Jowai (Mukhla) haka sngi nyngkong (Monday) 05-05-2025 naduh ka por 8 baje shiteng mynstep.
Katba ka RBDCA kan ïakhun pyrshah ïaka TDCA ha ka Semi Final ka ban long ha ka Zone-2 Mendipathar haka sngi nyngkong (Monday) ha ka juh ka por.
Ïa ka jingïakhun Final jong kane ka Under-16 Boys Inter District Cricket Tournament 2025 yn pynlong ha Jowai (Mukhla) ha ka sngi Wednesday, 07-05-2025.
