Jowai, Naiwieng 10: Ka lympung ïalehkai phutbol ha ka kyrdan ‘Super Division Football Tournament – 2024’ ïa kaba la tip kum ka “U Kiang Nangbah Memorial Trophy” bala pynïaid da ka West Jaiñtia District Sports Association, (WJDSA) Jowai kaba la long ha ka sngi Saitjaiñ (08 tarik u Naiwieng) ha madan Kiang Nangbah Stadium, Dongmihsngi Jowai.
Ha ka jingïakhun kaba nyngkong la sakhi ïa ka kynhun ïalehkai jong ka 7 Wasa United kaba la pynjemkhnap da 4-0 kol ïa ka Sailung Ialong. U Jeff K Rymbai u la ïoh ban pynkhih ar kol (84 & 90 minit) na bynta ka 7 Wasa United, katba u Niewkor Sana (60 minit) bad u Teiborlang Malang (72minit) ki la thep mar kawei.
Haba phai pat sha ka jingïakhun kaba ar, ka Ladthadlaboh kala pynliem noh da 2-0 kol ïa ka Mukhla Raij. Ha baroh ar kylla ka Ladthadlaboh ka la ïoh ban pynkhihjar, ha kaba ka kol ba nyngkong la thep da u Promise Suting haka minit ba 39 bad u Dowell John Shylla haka minit ba 79 jong ka kylla miet.
La pyntip ka jingïakhun ha kane ka Lah Sngi U Blei (11 tarik u Naiwieng), 2024 ka long hapdeng ka Shangpung Lumiawmushai pyrshah ïa ka Wahiajer haka por 11 baje mynstep.
