Shillong, Naiwieng 10: Ka East Khasi Hills ka la long ka Overall Champion ha baroh ar kyrdan shynrang bad kynthei ha ka lympung ïakop karate kaba la tip da ka 30th State Karate Championship 2024, kaba la pynkut ha ka sngi saitjaiñ.
Ka Eastern West Khasi Hills ka la wan ba-ar ha ka liang ki shynrang katba ka Ri-Bhoi ka la wan ba-ar ha ka liang ki kynthei.
Ia kane ka jingialehkai kaba lai sngi lynter la pynlong da ka All Meghalaya Karate-Do Association ryngkat ka jingiatreilang bad ka Directorate of Sports and Youth Affairs bad la pynlong ïa ka ha JN Indoor Stadium, Polo.
Mynta ka kynti kane ka lympung ïalehkai kaba ju pynlong man la u snem, la sakhi ba 456 ngut ki nongïalehkai karate ki la ïashimbynta naduh ka rta ba 6 snem shaneng ha baroh ar ki jait jingïalehkai, ba kynthup ïa ka kumite bad kata. Ki nongïalehkai Karate kiba kynsai na kane ka lympung kin shah jied ban mihkhmat ïa ka jylla ha ki lympung ïalehkai jong ka ri bad ha ka Meghalaya Games kaban sa long shen.
Ha ka sngi pynhap pyrda ïa kane ka lympung la wan Kongsan da u u MP ka Shillong u Bah Ricky AJ Syngkon. Ha kane ka sngi la donlang ruh u Working President ka Meghalaya State Olympic Association u Bah John F Kharshiing bad kiwei ki riew rangbah.
Ha kane ka sngi la pynbyrngia da ki jingïalehkai kiba itynnat na ki khynnah ha ki jingïalehkai kumite bad kumjuh ruh ka jingpyni sap na ka kynhun ki khynnah karate. Lah ban kdew ba ka kyrdan jong ka karate ka la nangroi bad janai kumba la sakhi mynta u snem, la sakhi ruh ïa ka jingaiti bad ka jinglong ryntih hapdeng ki khynnah lehkai.
Bun na kito kiba ladep ban pyni sap teng ha ki lympung ba la dep jong kane ka lympung mynta ki long hi ki heh bad ki nonghikai, da kaba ïarap ban thaw ïa ka lynti pynmih ïa ki sap karate kiba dei ban kyntiew ïa ka Meghalaya ban ïakhun bad kiwei pat ki ri ha ki snem ban wan.
Nalor ki khusnam sha ki kynhun, ba la sam da u Bah Ricky Syngkon, la sam ruh ïa ki khusnam shimet sha ki khynnah karate kiba kynsai (individual Best Karateka) da u Bah John F Kharshiing. Kine ki khusnam ki la leit sha u Fadrick Wanniang (Junior Boys), u Paul Danny Kharmudai (Senior Men), ka Audrella C Marbaniang (Junior Girls) bad ka Carene Sohiong (Senior Women). Ka Carene ka la mihkhmat ia ka Ri-Bhoi katba ki lai ngut kiwei pat kiba la khur khusnam shimet ki dei na ka East Khasi Hills.
Haba kren shwa ba un khylliap noh ïa kane ka lympung, u Bah Ricky Syngkon u la kyntu ïa ki nongïalehkai karate ba kin long kiba stad, kiba don ka jingkyrmen bad ban leh ïa kiei kiei baroh da ka jingsngewtynnat.
“Kine ki dei ki jingbam bad ki jinglong kiba kongsan ki ban pynlong ia ka pyrthei kaba pher,” u la ong. “Da ka jinglong ba shisha bad ka jingtrei shitom ngi lah ban pynkylla dur ia ka jylla jong ngi bad ia kane ka ri kaba khraw jong ngi lyngba ki jingialehkai.”
Ïa kane ka Championship la sdang ha ka sngi Thohdieng ha kaba la plie paidbah ïa ka da u Deputy Chief Executive Member jong ka KHADC u Bah Pynshngain N Syiem, ha ryngkat ka jingïadon lang u General Secretary ka Meghalaya State Olympic Association u Shri Finely L Pari , bad u Joint Secretary ka MSOA u P Laloo.
