Shillong, K’lyngkot, 03: Ka seng kieng atiar Hynniewtrep National Liberation Council (HNLC) ha ka sngi Balang ka la pynbna ka la weng noh na ka miej jingïakren ïasuk bad ka Sorkar India bad ka Sorkar Jylla kum ka dak ban pyrshah ïa ka jingbym shimkhia jong ka Sorkar ban pynurlong ïa ka jingdawa ba kongsan tam kaba kynthup ïa ka jingmap ei.
Ka HNLC lyngba u Chairman-cum-C-in-C u Bah Bobby Marweiñ bad u General Secretary-cum-Publicity Secretary u Bah Saiñkupar Nongtraw, ka la phah da ka shithi sha ka Ministry of Home Affairs (MHA) lyngba u Advisor (MHA, Northeast) u AK Mishra ban pyntip ïa kane ka rai. Katkum kane ka shithi, ka HNLC ka la pynpaw ba ïa kane ka rai la shim halor ka nongrim ba ka Sorkar kam shym la pynurlong ïa ki mat jingdawa ba ka seng ka la buh hakhmat shwa ban sdang ka jingïakren ïasuk.
Ka HNLC ka la phah kopi ruh ïa ka shithi sha u Myntri Rangbah ka Jylla, u Myntri ka tnat Kam Pohiing bad sha ki Ksiang ka Sorkar bad ki Nongmihkhmat jong ka HNLC sha ka miej ïakren ïasuk.
Ha u kyrwoh ba la phah sha ki lad pathai khubor, u General Secretary cum Publicity Secretary ka HNLC Bah Saiñkupar Nongtraw u la ong, “ka jingthmu jong kane ka jingpyntip ka long ba pynbna i aka rai ba ka HNLC ka la weng noh na ka miej jingïakren. Ïa kane ka rai la shim kum ka jubab halor ka jingbym shimkhia jong ka Sorkar ban sngap ïa ki jingdawa ba kongsan eh jong ngi.”
U Bah Nongtraw u la ong ba kine ki jingdawa ki dei kiba ladep ban phah sha ka Sorkar India da u General Secretary barim u (L) Bah Cheristerfied Thangkhiew ha ka 16 tarik, Kyllalyngkot, 2021.
“Wat hapdeng ki jingtrei shitom ban ïai ban bad ban pynsngew ïa ki jingdawa jong ngi lyngba u nongrah ktien u Bah Sadon Blah, ka Sorkar ka la pyni ïa ka jingbym shimkhia ïa ki jingdawa jong ngi. Kumba ka paw, ïa ki jingdawa jong ngi ym shym la ïakren, lehse na ka jingbym kheiñ snep jong ka Sorkar,” u la ong.
Ki san tylli ki jingdawa kiba ka HNLC ka la tyrwa hakhmat ka Sorkar ki long ban weng noh ïa ka jingkheiñ beaiñ ïa ka Seng. Ïa ka HNLC la kheiñ kum ka seng be-aiñ hapoh ka sub-section (1) jong ka Section 3 jong ka Unlawful Activities (Prevention) Act, 1967.
U la bynrap, “ngi la tyrwa ban weng lut ïa baroh ki Case pyrshah ïa ki nongïalam bad ïa ki dkhot jong ngi ha ki Ingkashari kiba rit bad ha ki Ingkashari kiba heh ha baroh kawei ka jylla, khamtam eh ïa ki Case kiba ïadei hapoh rilum Khasi bad Jaiñtia. Ka jingweng noh ïa baroh ki mukotduma kan pynshngaiñ ïa ka jingïakren,” bad bynrap, “ka long kaba kongsan ban plie ïa ka lynti kaba shngaiñ na ka bynta ki nongïalam bahakhmat eh bad ki dkhot jong ka HNLC. Ban pynthikna ïa ka jingshngaiñ jong ngi kan wanrah ïa ka jingshaniah bad kan plie lad ruh ïa ngi ban ïashim bynta ha ka jingakren ïausk.”
“Ngi la tywa ban thung ïa ki nongmihkhmat ba la pynkupbor kiba lah ban rah ktien bad ban pyntyllun shakhmat ïa ka jingïakren. Ban pynbeit ïa ka rukom phah ktien lyngba ki nongmikhmat ba la pynkupbor kan ïarap ban pynstet ruh ïa ka jingïakren,” u la bynrap.
U Bah Nongtraw u la ong ba ka HNLC ka la kyrpad ruh ban pyllait noh ïa baroh ki dkhot ka HNLC bad ïa ki riewshimet kiba la shah kem halor ka jingshah suba ba ki dei kiba donkti bad ka HNLC kiba dang don mynta ha along.
“Ïa kane ka jingdawa, la phah lyngba u Ksiang jong ngi, u Bah Sadon Blah. Hynrei, kaba kham kongsan ban tip ka long ba tang ïa ka jingdawa jong ngi kaba 3 bad kaba 4 la mynjur da ka Sorkar napdeng ki san tylli ki jingdawa,” u la bynrap.
Shuh shuh shuh, u Bah Nongtraw u la ong ba ka seng ka la ïai pyntip la bunbun sien lyngba ki lad pathai khubor bad kumjuh ruh sha ki Ksiang bad sha ka Sorkar, da kaba kyntu ba kim dei ban phah ïa kano kano ka jingkhot hajir kaba lah ban nang ai ding shuh shuh bad bynrap, ‘sngewsih, ba ki jingkyrpad jong ngi kim shym la sngap, ka jinglon jingman ka la nang heh khlem nongrim.”
Ha kajuh ka por, u General Secretary ka HNLC u la pyntip ba ha ka wat ïakren kaba nyngkong hapdeng ka Sorkar Meghalaya bad ka Sorkar India, ki kynhun kiba la phah da ka Seng ki la wan phai sha la ktem ha ka 16 tarik, Nailur, 2022, ban pynlong ïa ka General Council bad CEC ban ïakren halor ka jubab ïa ki jingdawa da ka Sorkar India ba baroh ki nongïalam jong ka HNLC ki dei ban wan shakhmat ban ïashim bynta ha ka miej ïakren ïasuk. La shim ïa ka rai (ba la mynjur da ka GC/CEC) ba ka Sorkar kan ïakren tang bad ka kynhun ba la lamkhmat da u Vice Chairman tad haduh ba ki arliang mamla kin da poi sha ka jingïamynjur ban ïasoi ïa ka soskular sangeh ïasiat.
“Ha ka jingïakren kaba bud, ka Sorkar, hapoh ka jingïalam jong u Vice Chairman, ka la mynjur ban pynlong ïa ka jingïalang. Hynrei, khlem poi pyrkhat, ha ka jingakren ba dang shu sdang, ma nga, kum u General Secretary, la pynbor da ka Sorkar ba nga hap ban mihkhmat ha ka jingïakren ka ban sa long,” u la ong.
“Kaba pynsat shuh shuh ïa ka jingmong, ka jingleh arsap jong ka Sorkar ka la paw shynna haba ka National Investigation Agency (NIA) ïa ka khot hajir ïa nga, u Chairman bad ïa u Finance Secretary wat haba ka jingïakren ka la sdang ban ïaid shakhmat,” u la bynrap.
Shuh shuh u Bah Nongtraw u la ong, ha ka jingïakren ba nynkong, ki bor sorkar ki la phah sa kawei ka notis ban khot hajir ïa u, kaba long pyrshah ïa ka jingkular ba la ai da ka Sorkar India bad ka Sorkar Meghalaya ban kiar na kaba hah ïa ki shithi khot hajir ne ban kem ïa ki nongïalam bad ïa ki dkhot jong ngi katba ka jingïakren ka dang tyllun shakhmat.
“Wat hapdeng ka jingma ba la shim da ki nongïalam jong ngi bad ki Personal Security Officers (PSO) ban ïashim bynta ha ka jingïakren, lada ka Sorkar ka kyntait ban ailad ïa ka jingsuk, kim lah ban shu pynkit pap ha ka HNLC ba ka shim da ka lynti jong ka jingïaumsnam. Khnang ba ka jingïakren kan long kaba ïaid beit, ngi la pynsangeh lut ïa ki kam be-aiñ, ïa kaba ngi kyrmen ba ki paidbah ka Bri u Hynñiewtrep ki la ïohi lyngba ki lad pathai khubor. Mynta, wat ym khmihlynti shuh ïa ka HNLC ba kan wanphai ban kyrpad ïa ka jingsuk kum u ksew uba kwah shyiengdoh,”u la bynrap.
