Shillong, Nailur 25 : Ka Bharatiya Janata Party (BJP) mynta ka Lah Sngi U Blei ka la weng kyndit ia u bah Ernest Mawrie kum u President ka BJP hangne ha Meghalaya bad thung ïa u Rikman Momin kum u Presdient ba thymmai.
Kat kum ka shithi ba la phah da u National General Secretary sha u State Incharge/State General Secretary (Org), Meghalaya, la pyntip ba kane ka jingthung ïa u Rikman Momin kan treikam noh marmar.
U Arun Singh u pyntip ba ïa u Rikman Momin la thung da u National President ka Party u Jagat Prakash Nadda.
Lah ban kdew hangne ba ïa u Bah Ernest Mawrie, la thung kum u President ka BJP-Meghalaya ha ka 15 tarik Kyllalyngkot 2020 bad ka samoi treikam jong u, ka la kut naduh shuwa ka elekshon MLA 2023.
Ka jingïakhih ban weng noh ïa u Bah Ernest Mawrie na ka shuki President kala jur bha ha ki snem bala leit noh khamtam na ki arngut ki MLA ka party bad ki Nongïalam na kylleng ki District.
Ki jingkynnoh ki la mih ruh pyrshah ïa u Bah Ernest Mawrie ba u treikam kum u Nongïalam tang ban pynhun paralok ne ba haïing hasem khlem da pyrkhat ïa ka bha ka miat jong ka Party ha Jylla.
Kane ka jingbujli Nongïalam kala mih tang hadien katto katne sngi ba u Bah Ernest Mawrie ula ong ba ki Nongïalam na Delhi kin sa shim rai la un dang bteng ne em ban bat ïa ka shuki President.
“Nga la pyndep ïa ka samoi jong nga ba lai snem. La ngan bteng ne sangeh noh kan shong ha ka rai jong ki Nongïalam na Delhi” ula ong.
U Bah Ernest ula ong ïa kane haba kynthoh ïa ka jingkren u MLA ka BJP na Pynthorumkhrah Bah A.L.Hek ba ka don ka jingthmu ban weng noh ïa u Bah Ernest kum u President ka BJP Meghalaya.
Lah ban kdew hangne ba ka BJP ha u snem 2022, kala ai ticket ïa u Rikman G Momin kum u kyrtong ban ïakhun ïa ka elekshon Lok Sabha na Tura hynrei u khlem jop.
Haba ïakren bad u President ba thymmai ka BJP u Rikman Momin u la ong ba ka thong ba hakhmat eh jongu ka long ban pynkhlaiñ ïa ka party. “ Ngin trei shitom da kaba leit sha man la ki kyndong kynshrot ban pynkhlaiñ ïa ka party” ong u Rikman.
U la ong ba ka party kan leit ban pynshai bad pynsaphriang ïa ki skhim bad prokram kiba u Myntri Rangbah duh u Narendra Modi u la pyntreikam na ka bynta ki paidbah khamtam kiba duk ba rangli.
U la kular ban bud dien ruh na ka sorkar pdeng ïa ka ILP bad ka jingpynrung ia ka Ktien Khasi bad Garo ha ka Khyrnit kaba Phra.
U la ïathuh ba un ym ïakhun ïa kane ka election MP Lok Sabha ka ban sa long ha u snem ban wan tangba u la ïathuh pat ba ka BJP kan sei beit ïa ki kyrtong na ka Shillong bad Tura Parliamentary Constituency.
