Shillong, Rymphang 24: U President ka Congress u Bah Vincent H Pala u la pynpaw ka jingai khublei ïa ki paidbah ka Khasi bad Jaiñtia Hills ba ki kyrshan ha kane ka elekshon Autonomous District Council (ADC) ba dang shukut.
“Watla ki result kim dei sha ka liang jong ngi, nga ai khublei ïa ka jingai jingkyrshan bad ka jingshaniah jong baroh,” ong u Bah Pala.
Ka Congress ka la jop tang 3 seat na Jaiñtia Hills Autonomous District Council (JHADC) bad ka khlem jop eiei pat ha Khasi Hills Autonomous District Council (KHADC).
“Nga kwah ban ai khublei ïa baroh ki kyrtong ka Congress kiba la ïakhun ïa ki election da ka jingaiti bad trei shitom, wat hapdeng kiba bun ki jingïaleh, kynthup ka jingshah shet kylla bad kiwei. Ka jingaiti ïa ki principle jong ka Congress party bad ki jingtrei kiba khlem shongthait ha ka ban shakri ïa ki paidbah kiba long barabor kiba shongdor bad kiba long kiba donburom,” ong u Bah Pala.
U Bah Pala u la ai khublei ruh ïa baroh kito ki kyrtong kiba la jop na ka seng Congress, khlem da kheiñ ïa ki party bad u la ong, “Ki paidbah ki la ai ka jingshaniah ha phi, bad nga kyrmen phin trei na ka bynta ka jingïalong kawei jong ki trai ri trai muluk bad ban ïada ïa ka mynsiem jong ka Sixth Schedule.”
U Bah Pala u la pynthikna ïa ki paidbah ka Meghalaya ba ka Congress Party kan ïaineh ha ki nongrim jong ki kam ban shakri da kaba hok bad jingaiti.
