Wat pynsep ei ïa ka Vote ban kyrshan ïa u kyrtong VPP kyrshan ia u Kyrtong RDA : Kharjahrin

Shillong, K’lyngkot, 23: Ka Regional Democratic Alliance (RDA) ka kynhun synrop jong ka UDP bad HSPDP ha ka sngi Baar ki la pynithuh paidbah ïa u Bah Robert June Kharjahrin kum u kyrtong ban aireng ha ka elekshon Lok Sabha na Shillong Seat.
Kane ka jingïalang ka dei ruh ka jingsdang ïa ka jingïalap elekshon jong ka RDA ïa u Bah Robertjune Kharjahrin.
Haba kren ha kane ka jingïalang u Chairman ka RDA u Bah Metbah Lyngdoh uba long ruh u President ka UDP u la ong ba ka jingïatreilang ki ar tylli ki seng riewlum ka dei namarba ki paidbah ki angnud ba kine ki ar tylli ki seng saiñpyrthei trai ri kin don ka jingïatreilang bad u la ong ba mynta ka dei sa ka pali ki paidbah ban ai jingkyrshan pura ïa u Bah Robert uba kum ka kynhun ki la i biang ban sei.
U Secretary ka RDA Bah KP Pangniang uba dei ruh u President ka HSPDP u la ong ba ka jingsei ïa u Bah Robert ka dei ka jingangnud ban rah biang ïa ka burom ka jaidbynriew hakhmat ka pyrthei bad ka dei sa u paidbah ban shim khia ïa kane ka mat.
U Co chairman ka RDA Bah Martle Mukhim kum u riew saiñpyrthei ba la ih bha u la ong ba ka jingïaid lynti jong ki seng saiñpyrthei trai ri ha ki snem kiba kham mynshuwa ka ladei ka sakhi ba lada ka UDP bad ka HSPDP ka ïatreilang u kyrtong ba ka sei ki ju jop beit na kata ka daw ha kane ka kynti kum ka kynhun kim don kano kano ka jingartaien ba u Bah Robert un jop ha kane ka elekshon ban wan.
Ha kane ka sngi u Bah Robertjune u la ai ruh ka jingkren kaba nyngkong eh ban ïalap ïa ka elekshon MP kum u kyrtong ka UDP uba la sei ïa shibun bah ki mat kiba u don ka thong na bynta ka jaidbynriew bad ka jylla baroh kawei.
U la ong ba ki paidbah nongkyrshan jong ka Voice of the People Party (VPP) bad ki paidbah jong ka Shillong Parliamentary Constituency kim dei ban pynsep ei ïa ka vote jong ki ban kyrshan ïa u kyrtong ka VPP namar um don jingkyrmen ban jop namar ka VPP ka dang tlot ha kiba bun ki constituency.
U la ong ba ha ka elekshon kaba dang shu dep dei ka UDP kaba jop bun tam ki MLA na baroh ki seng riewlum bad ka jingdon jong ki MDC ruh kiba bun tam na ki seng riewlum dei na ka UDP na kata ka daw u don ka jingsngew skhem ba kum u kyrtong ka RDA ba la kyrshan lang da ka UDP un dei tang ma u na para kyrtong seng riewlum kiba don ka bor ban ïakhun pyrshah ïa ki kyrtong ki national party.
U la kular ba un long u simpah simsong jong ka jaidbynriew ha Parliament ban kren ïa ki jingeh jong ka jaidbynriew bad ban long ruh ka sur ban pyrta jam ïa ki jingangnud ka jaidbynriew ha kiba bun bah ki mat ba kynthup naduh ka ILP, ka Ktien Khasi, ban pynkhlaiñ ïa ka Sixth Schedule bad kiwei kiwei ki mat.
Shuh shuh u ong ba um shym mutdur satia ba ki nongïalam barangbah ka RDA ki ibit ban jied ïa u kum u kyrtong ban aireng na Shillong Seat bad pynpaw ba ha kano ka nongrim kine ki nongïalam ki ki pynshong nongrim ïa u kum u kyrtong ka RDA namar u dei tang uba rit eh ha ka kyrdan ban ïa nujor bad kiwei pat.
U la ong ba u shim ïa kane ka jingjied jong ka RDA ïa u uba dei uba duk bad ba khun swet u bym pat don jingtbit ha ka saiñpyrhtei ruh hynrei ka jingbynshet jong ka RDA ba un long u kyrtong ka la dei ka jingai burom ba khraw bad ka pyni shai ba ka RDA ka dei ka kynhun jong u duk u rangli, u khun swet bad ki shem lanot.
U Bah Kharjahrin u la pynpaw ba ka jingmih jong u ban aireng ha kane ka elelction MP ka long ym ban kynthoh ïa kiwei ki seng ne ïa kiwei ki kyrtong hynrei ban kren ïa ki nongrim kiba u don na bynta ka jaidbynriew baroh kawei bad ka jylla hi.