Ka jingthung bad jingweng ïa ki ophisar ka long katkum ki aiñ ki kyndon ka Lokayukta : CM

Shillong, Kyllalyngkot 23 : U Myntri Rangbah ka jylla u Conrad K Sangma mynta ka Sngi Ba Ar u la ong ba ka jingthung bad jingweng ïa ki Ophisar ka Lokayukta ka long kat kum ki aiñ ki kyndon jong ka Lokayukta khnang ban pynthikna ba kan ym don ka jingpynlut pisa tam na ka liang ka sorkar.
Haba kylli halor ka jingïakhih pyrshah ka VPP ban thung kam biang ïa ki ophisar kiba la shongthait bad kiba la shah weng na ka Lokayukta u Myntri Rangbah u la ong ba ka sorkar ka la dep pynshai la bun bun sien balei ba la thung ïa kine ki briew mynshwa khlem da bud ïa ki kyndon aiñ ka dei namar ba la shu thung ïa ki tang katto katne por.
“ Ka ain ka kren shai ba u ne ka ophisar ban thung ha ka Lokayukta ki dei ban long ha ka kyrdan Secretary shaneng hynrei ha kato ka por ngi ïa kynduh ïa ka jingeh namar ba duna ophisar kumta ngi la rai ban shu thung shipor ar por da kine kiba la shongthait ka bym long pat kat kum ki kyndon aiñ kumta ban pynbeit ïa kane hap ban bud ïa ki kyndon aiñ ba dei ban dei ki ophisar ha ka kyrdan Secretary shaneng.
U la ong sa kawei ruh lada thung da kiba la shongthait ka sorkar kan hap ban siew ïa ki bad kan long ka jingpynlut kai ïa ka pisa.” Hynrei lada thung da ki ophisar kiba dang shakri ha ka kam ym donkam ban siew namar ki dei kiba la ïoh la ka tulop katba ïa kiba la shongthait hap ban siew da ka sorkar kumta kumba ka aiñ ka la kdew kumta ruh la hap ban bud bad na ka bynta ka jingmyntoi ïa ka jylla ïa kine ki post ruh la dei ban ithuh ne regularise naduh kaba sdang hynrei ka shim por kumba shisnem tam ban regularise bad hadien kane la bud thik kat kum ki kyndon aiñ jongka Lokayukta.
Halor ka rai jongka VPP ban sangeh ïakhih shwa namar ba la khot ïakren ka sorkar, bad haba la kylli lano un khot ïakren ïa ki, u Myntri Rangbah u la ong “ Ngi long kiba la kloi bad ka jingkhang ka plie ha kano kano ka por lada don kiba kwah ban ïakren bad ïa kynduh ki lah ban wan bad ïa kynduh ïa nga ha kano kano ka por ba ki kwah”.