Wat ngeit ia kito kiba kiba ïalam bakla ba ka la seng ïa ka VPP ban ïaleh pyrshah ïa ki bar jylla : Ardent

Shillong, Lber 19: Ka Voice of the People Party (VPP) mynta ka sngi ka la rung syndon ha ïing jong ka Kyrtong MP ka Seng NPP, ka Dr. Ampareen Lyngdoh bad la ïohi ba u paidbah u la dap mam ha ka ka surok kaba la pynlong jingïalang ha Laitumkhrah Beat House.
Haba kren ha kane ka jingïalang u Bah Ardent Miller Basaïawmoit, President ka Seng, u la pynshai ba ki paidbah kim dei ban ngeit ïa kito kiba la pynsngewthuh ba bakla da kaba ong ba ka la seng ïa ka VPP ban ïaleh pyrshah ïa ki bar jylla kiba shong ba sah ha kane ka jylla.
Haba ai jingkren da ka phareng ha kane ka jingialang, u Bah Ardent u la ong, “La seng ïa ka VPP ym ban ïaleh pyrshah ïa ki bar jylla, hynrei ban ïaleh pyrshah ïa ka bamsap, ka jingleh shiliang khmat, ka jingsynshar bym hok kaba don ha ka jylla mynta”.
Hapdeng ka jingrisa kaba ir shi ir da ki paidbah, u Bah Ardent, u la ong ruh ki don ki Myntri jong ka sorkar mynta kiba ong ba ka VPP kadei ban sei ïa ki jingshisha halor ki jingkynnoh bamsap pyrshah jong ka. U Bah Ardent u la jubab da kaba ong, “Ai ha ngi ïa ka bor synshar ngin sei lut ×a ki kam bamsap kiba don ha ka jylla, hynrei mynta haba ngim don ha ka bor te kumno ngin sei ne pyni”, u la ong.
U la ong ba ka elekshon MP mynta ka kynti ka shongshit bha namar ka jingleit ka VPP kylleng kylleng ban pynsngewthuh ïa ki paidbah ïa ka hok jong ki nongthep vote bad ïa ka jingïashim bynta ki paidbah ïa ka elekshon da kaba khuid ba suba. U Bah Ardent, u la ong ba ki bor pynïaid elekshon kidei ban sngewnguh ïa ka VPP ba ka shim ïa kane ka bynta ban ai jinghikai ïa ki paidbah halor ka jingleit jong ka kylleng kylleng ban pynsngewthuh ïa ki paidbah ba kin ïa mih paidbah ban leit thep vote ban jied ïa u MP, namar ha Meghalaya ki paidbah kim ju shimkhia ban leit jied ïa u MP jong ki. “Ka Election Commission kadei ban ai khusnam ïa ka VPP namar kane”, la ong u President ka VPP.
U Dr. Ricky AJ Syngkon, uba long u kyrtong MP ka Seng bad u General Secretary, ha ka jingkren jong u, u la ong ba kawei na ki jingïakhun ka VPP lada ki paidbah ba un mihkhmat sha Lok Sabha ka long ban peit na ka bynta ka hok jong ki samla trai jylla kiba dei ban ïoh kam ïoh jam ha ki ophis sorkar pdeng kiba don ha ka jylla. “Ngi la ai shibun ka jaka ïa ki bor treikam ka sorkar pdeng, kum ka NEHU, ka ICAR bad bun kiwei pat ki ophis treikam, hynrei balei pat kine kim lah ban aikam aijam ïa ki samla trai jylla ha ki post kiba dei ban ïoh ki trai jylla’, la ong u Dr. Ricky.