Wat nang tang ban kdew kti, hynrei kdew lynti da ki nongmuna ba bha: Donbok Dkhar, President ka HITO

Mawkyrwat, ‘Naiwieng 21: Ka Hynñiewtrep Integrated Territorïal Organisation (HITO) ha ka sngi saitjaiñ jong ka taïew ka la ïoh ban pynkha ïa ka shnad treikam ba thymmai hapoh jong ka South West Khasi Hills District, Mawkyrwat ha kaba u samla Polius Thyrnïang kum u President bad u H. Marshal Lamsiej kum u Secretary jong ka HITO, South West Khasi Hills District.
Ïa ka jingïalang la pynlong hapoh ka Community Hall Mawkyrwat, ha kaba u samla Benjohnson Lyngdoh haba kren kum u kongsan ha ryngkat ka jingïadonlang jong ki dkhot jong ka HITO na Central Body, ki nongïalam shnong jong ka Shnong Mawkyrwat bad kiwei de kiba la shah khot sngewbha ha kane ka sngi.
U samla Benjohnson Lyngdoh haba kren kum u kongsan u la pynpaw ka jingaikhublei na ka bynta ki samla kiba don ïa kata ka jingkitkhlieh bad ban ïatynrong lem ïa ka khïa ka shon bad ki jingeh jong ha ka ri bad ka jaidbynriew bad hapoh jong ka South West Khasi Hills District baroh kawei. U la ong ruh ba kum kawei na ki seng kiba dang thymmai ka Hynñiewtrep Integrated Territorïal Organisation (HITO) tang ha ki khyndïat por ka la leh shibun bah ki kam kiba long ka jingmyntoi ym ïa ka seng hynrei ïa ki paidbah jong ka jylla baroh kawei.
Kumta, u la ong ba na ka bynta kane ka seng HITO u ai ka jingkyrshan ba kan nang ïaid shakhmat ban trei ïa ki kam ban wanrah ka jingbha jingmïat ha imlang ka sahlang, ka ri bad ka jaidbynriew bad ki samla jong ka dong ka thaiñ baroh kawei ruh nangkhlaiñ ha ka jingïalong shitylli. Ha kawei pat ka lïang u la ong ba haba kum ki samla ki don ka bynta ban ïa kit ïa bah ha ka imlang ka sahlang ki don shibun ki jingshah kynthoh hynrei watla kata ruh u la ai mynsiem ba kim dei ban kynran dien hynrei ki dei ban tur shaphrang ïa kaei kaba ki thmu ban leh bad kim dei ruh ban ïa kdew kti iwei ïa iwei pat pynban ki dei ban ïa ai jingmut bad ai mynsiem khnang ba ki jingthmu thmu ba bha kin urlong.
Ha kawei pat ka bynta u la kyntu na ka bynta ki para samla ba haba ki don ka jingkitkhlieh na ka bynta ka ri bad ka jaidbynriew ki dei ban ruh ban don ka jingkitkhlieh lem ba wanrah ïa ka bha ka mïat da kin long kiba peit ngor ruh ha ki kam kiba ka imlang ka sahlang mynta ka don hapdeng ki jingïaleh ban rad-dyngkhong ïa ki jingsniew kiba la jyllei kum u drok, ka kyïad bad kiwei kiba long ka daw jong ka jingma ïa ki khun hep kiba rit.
Namarakta, u la la ai ka jingkitbok kitrwïang na ka bynta ka HITO ba ai ba ki kam jong ka kin kren khamjam ban ïa ka ktien bad ki kam kiba bha jong ka seng kin ïa tyllun na kawei ka por sha kawei pat.
“Ngim dei ban nang tang ban kdew kti, hynrei ngin kdew lynti da ki nongmuna ba bha”, ong u bah Donbok Dkhar, President ka Hynñiewtrep Integrated Territorïal Organisation (HITO) Central Body ha ka jingkren jong u ha ka jingïalang ban pynskhem ïa ki nongkitkam ba thymmai jong ka Hynñiewtrep Integrated Territorïal Organisation (HITO), South West Khasi Hills District. Shuh shuh ha ka jingkren jong u u la pynshai ruh halor ka jingmut ba hakhmat eh jong ka Hynñiewtrep Integrated Territorïal Organisation (HITO) ha kaba la seng ïa ka ha ka 3 tarik u bnai Ïaïong, 2021 ban pyni ba ka HITO ka don ïa ka nongrim ban ïaleh nyngkong eh ban pynduh ïa ka jingngeit biej bad man ki jingdawa ba ka HITO ka don bun kiba la poi sha ka thong.
U la ong ruh ba ban long uta u ‘riew ieit ri kum ki samla ki dei ban pynshong ïa la ka nongrim namar ki dei ma ki ki ban tei lane ban peit ïa ka lawei jong ka jaidbynriew. “U ‘riew ieit ri u dei ban ieit naduh klongsnam bad ymdei ruh ban shynraiñ”, u la ong bad kum ka HITO hi ba ha kiba bun ki jingdawa kan shym la shynraiñ hynrei ka tur shakhmat ryngkat ka jingkut jingmut ban ïoh ïa la ka hok longtrai. Namarkata, u la kyntu ba kum ki para samla jong ka dong ka thaiñ ki dei ban kit ïa ka lyngkor da kaba pule bha bad haba hikai ruh dei ban hikai da ka lynti kaba khuid ba suba bad ymdei ban ngop ha ka spah ka phew ba shipor namar lada la shah pynbeij ha ki sbai rupa ruh kita kiba shim kin bam hi tang shi plïang ka jaka.
“Kumba ngi long kita ki ‘Political Leader’ ba haduh mynta ngim pat long kita ki nongshong shnong jong ka Ri Indïa”, ong u bah Donbok bad balei u ong kumtei ka long namar lada ka sorkar Indïa kam pat ai ïa ki jaka pule kiba bïang, ki jaka sumar kiba bïang, kam pat lah ban pynbïang ïa ki kam ki jam jong ki khun samla, kam pat ai ka jaka, ka khyndew ka shyïap, u pud u sam uba bïang bad ka hok jong ki paidbah ngim pat dei shisha kita ki nongshong shnong jong ka Ri Indïa hynrei ngi dei tang ki nongthep vote.
U la khot ruh ba kum ki khun samla ki dei ban im bad ïeng skhem trïang ha ka nongrim ban ïeng ïaleh ryngkat ka jingtynjuh bor pyrshah ïa ka sorkar Indïa ne ka sorkar Meghalaya namar kumba ka long ba ka sorkar kam sngap ïa kino kino ki jingdawa lait noh tang shwa ka elekshon kan sa sngap.
“Shi sien phi la rung dkhot ha ka HITO, wat long kiba synraiñ hynrei ki dei ban don ka mynsiem jong ka jingrai-kut ban pyndep hok ïa la ka bynta”, ong u bah Donbok bad wei la rung ha ka HITO wat mut ba ki lah ban shna ki lad jingkamai pisa lyngba jong ka namar wat ki nongïalam ba hakhmat jong HITO ruh ki don pisa bad ka jingshah tyrwa ruh ka la long thik kumba tyrwa khlieh snïang.
Kiwei pat ki nongkren ha kane ka sngi ki long u Secretary jong ka Shnong Mawkyrwat, bah W.L. Snaitang bad bud sa ka jingkren ha ryngkat ka jingpynskhem ïa ki nongkitkam ba thymmai jong ka HITO South West Khasi Hills District da u bah Donbok Dkhar, President ka HITO Central Body bad ki nongkitkam ki long President u Polius Thyrnïang, Vice President u Stoping Lyngdoh Nonglait, Secretary u H. Marshal Lamsiej, Assistant Secretary u Senpur Wannïang, Finance Secretary u Johnstarwel Tyrnïang, Assistant Finance Secretary u Firesing Lyngdoh, Publicity Secretary u Arning Khyllait, Assistant Publicity Secretary u Liberius Thyrnïang, Political Secretary u John David Thyrnïang, Assistant Political Secretary u Krandising Lyngdoh, Education Secretary u Angello Syiemlieh, Assistant Education Secretary u Bokstar Thyrnïang, Sports Secretary u Enboklin Tongwang, Assistant Sports Secretary u Macsteven Lyngdoh, Discipline Secretary u Teiborlang Lyngdoh, Assistant Discipline Secretary u Donald Thyrnïang bad u Documentary Secretary u Tomland Ramsiej.
La pynshit pynshngaiñ ïa kane ka program da ka jingshad na ka samla Phibalari Thongni bad na u samla Badonlang Lyngdoh na ka PHL Group.
Ïa ka jingïalang la pynïaid da u bah Treibor Thyrnïang, President ka HITO West Khasi Hills District bad uba dei ruh u In-charge ka Eastern West Khasi Hills District bad bud ka jingrwai jong ka seng HITO, nangta, ka jingkren pdïang na u samla Arkodius Syiemlieh bad ka jingkren khublei na u samla Polius Thyrnïang, President ka HITO, South West Khasi Hills District.