Wat i beiñ ïa ki briew kiba don jingduna ha ki dkhot met namar ka aiñ ka don: N. Hahshah

Mawkyrwat, Nohprah 03: Ka ophis jong u District Social Welfare Officer (DSWO), South West Khasi Hillls Distrik ryngkat ka jingïatrelang ka District Sankalp Hub Empowerment of Women bad ruh ka District Legal Service Authority (DLSA), South West Khasi Hills District ha ka sngi Baar ka la rakhe ïa ka ‘International Day with Person on Disability 2024’, da kaba buh ïa ka phang pdeng, “Ka jingpynkhraw ïa ka jinglong nongïalam jong ki briew kiba don jingduna ha ki dkhot met na ka bynta ka Lawei kaba kynthup lang bad kaba neh”, kaba la pynlong ha Nativity Hall Mawkyrwat, South West Khasi Hills District.
Ha kane ka sngi ka kong Nosmi Hahshah, Chief Legal Aid Defence Councel jong ka District Legal Services Authority (DLSA), South West Khasi Hills District ka la long kum ka kongsan ha ryngkat ka jingïadonlang u bah E. Tariang, District Social Welfare Officer (DSWO), South West Khasi Hills District bad ba la pynïaid ïa ka jingïalang da ka kong Darisuk Marngar bad jingkren khublei na u bah Sendar Myrthong, MRW jong ka Ranikor C&RD Block.
Ka kong Nosmi Hahshah haba kren kum ka kongsan ka la ong ba kane ka sngi ka dei ka sngi kyrpang ban kynmaw burom ïa ki briew kiba don jingduna ha ki dkhot met namar ban burom ïa ki ba ki ki don shisha ïa ki sap ba kyrpang katkum ka jinglah jong ki ha ki kam bapher bapher. Kumta ka la ai mynsiem ïa ki, ba watla ki don ïa ki met bym biang kum kiwei pat hynrei kim dei ban don ka jingsngewnoh mynsiem.
Ka la pynkynmaw ruh ba ha ka imlamg ka sahlang la ju sakhi ba ki don ki bym kheiñ ne ñiew kor ïa ki briew kiba don jingduna ha ki dkhot met, hynrei da ka jingdon ïa kum kine ki jait program kin pynshai ne pynkynmaw ïa iwei pa iwei ba kin don ka jingñiew kor ym ban i beiñ namar ma ki ruh ki don ïa ka hok kumba long lem kiwei.
Ka Kong Hahshah ka la ïathuh ruh ba ki don ki aiñ kyrpang ban ïada ïa ki lada don mano mano ba i beiñ ne ñiew beiñ ïa ka jingim jong ki bad ym tang kata ka la ïathuh ruh ïa ki lad ki lynti kumno ba kum kine ki briew kiba don jingduna ha ki dkhot met ki lah ban ïoh kum ha ka pule puthi, ka jingïoh ïa ki skolarship, bad kiwei de ki lad jingïarap ba ka sorkar ka la dep ban mang kyrpang. Ha kajuh ka por ka da kyrpad ruh ïa ki paidbah ba lada ki don jingeh ban wad ki lad jingïarap khamtam ban ïoh ïa ki kot ki sla na ka bynta ka jingdonkam jong ki khun jong ki, ba ki don jingduna ha ki dkhot met, ka ophis District Legal Services Authority ka long ba la kloi ban ïarap bad ïa kiwei de ki jingïarap ba ïa dei bad ki kam ba ïa takhu bad ka aiñ hapoh ka kyndon ba 12 jong ka Legal Services Authority Act.
Ha ka jingkren mait phang, u bah E. Tariang, District Social Welfare Officer (DSWO), South West Khasi Hills District ula ong ba la rakhe khnang ïa kane ka “International Day with Person on Disability” ne ka “Sngi kyrpang jong ki briew ba don ka jingduna ha ki dkhot met”, namar la ithuh ïa ka da ka UNO. U la ong ruh ba ka jingthmu jong kane ka jingrakhe ka long ruh ban kyntiew ïa ka hok, ïa ka bha ka miat, bad ban kyntiew ruh ha ki liang baroh na ka bynta ka bha ka miat jong ki. U la ong ruh ba ka dei ka sngi ban pynsaphriang ïa ka khubor ba ki briew kiba don ka jingduna ha ki dkhot met ki don ïa ka bynta kaba khraw ha ka imlang ka sahlang kum ha ka synshar khaddar, ka kamai ka kajih, ka khaïi pateng, ka ïoh ka kot, ha ki jingpule bad ha ka riti dustur.
“Kane ka sngi ka pynkynmaw ruh ba la ngi don ha kano kano ka jinglong la ngi biang ha ka met ka phat lane ngi duna hynrei hakhmat U Blei ngi long kumjuh”, ong u bah Tariang. Namarkata, ka long kaba donkam ban ieit bad burom ïa ki ha ki por baroh.
Ha kane ka sngi kyrpang jong kiba don jinglong kyrpang ha ki dkhot met la ïoh ruh ban Ot ïa u Cake da kaba pynbud ruh ïa ki jingaisngewbha da ki jaiñ kup thiah ïa baroh kiba la wan ha kane ka sngi kum ka dak ka jingrakhe ne lehkmen khristmas ne Advance Christmas.