Nongstoiñ, Nohprah, 03: Ka Meghalaya State Rural Livelihoods Society (MSRLS) bad ka District Mission Management Unit (DMMU) Eastern West Khasi Hills District Mairang, mynta ka sngi ka la pynlong ïa ka District and Block Level Gender campaign halor ka phang pdeng ‘Ym don jingpynrem, ka jingïatylli ban pynkut noh ïa ka jingshah lehbeiñ ïa ki kynthei.
La sdang ïa kane ka prokram da ka jingïaid paitbah ba la sdang na DC ophis, Block Ophis Mairang bad na ka shnong Lumsohkhlur bad la pynlong ïa ka prokram ha madan ïalehkai phutbol jong ka St. Thomas Higher Secondary School.
Ha kane ka sngi la wan ban ïa don lang ka Deputy Commissioner Eastern West Khasi Hills District Mairang ka kong Mitali Chandra IAS kum ka kongsan bad u Project Director DRDA Eastern West Khasi Hills District u bah A.Nongbri MCS kum u symbud kongsan, ha ka jingïadonlang u Block Development Officers jong ka Mawthadraishan C&RD Block u bah W.L Massar, ki nongïalam jong ka Cluster Level Federation, ki dkhot jong ki Voluntary Organization bad ki dkhot jong ki Self Help Group.
Ha kane ka prokram la sam ruh ïa ki syrnod sha kito ki VO ba la trei shitom ha ki bynta bapher bapher kiba ïarap ha ka bha ka miat ha ka imlang ka sahlang. Ha kane ka sngi la ïoh ruh ban plie paitbah ïa ka Gender Campaign da ka Mitali Chandra DC EWKHD bad kiwei ki ophisar.
Ka kong Mitali Chandra haba kren kum ka kongsan ka la kyrpad ïa ki dkhot jong ki SHG ba kim dei ban lehraiñ lane ban sngew tieng haba ki don kano kano ka jingshem jong ki, ba kim dei ban shu sngap hynrei ki dei ban mih sha khmat ban kren haba ki don kino kino ki jingjia ha ki shnong ki thaw bad ha ka imlang ka sahlang. Nangta ka la ïaroh ïa ki SHG baroh kiba la trei shitom ba ym dei tang ha ka jylla jong ngi, hynrei ha ka ri India hi baroh kawei ba ka sorkar ka la ïohi ïa ka jingtrei shitom jong ki dkhot jong ki SHG.
Ha kane ka prokram ka la don ruh ka jingpynshai na ki nongmihkhmat na ka District Legal Services Authority (DSLA) West Khasi Hills District, Nongstoiñ, na ka One Stop Centre Mairang bad na ka tnad Pulit kiba la ai ïa ki jingkren bad jingpynshai ïa ki lad jingïada kiba katkum ki aiñ na ka bynta kito ki kynthei kiba ngat ha ka jingshah thombor bad kiwei kiwei ki aiñ ban ïada ïa ki kynthei ki khynnah.
