Shillong, Rymphang, 04: Watla ki nongtrei jong ka Shillong Municipal Board (SMB) ki la trei shitom baroh shimiet haduh mynstep ban ïoh sei ïa u Bah Marshall Marweiñ uba la shah tap ha ka jingtwa ka synrum jaboh ha Marten hynrei haduh mynta kim pat lapdien satia ïa u.
Halor kane ka jingjia ki ophisar ka Shillong Municipal Board ba kynthup ïa u Chief Executive Officer (CEO) u PK Boro bad u Executive Engineer Bah FB Chyne ki la hiar da lade sha Marten ban peit ïa ka jinglong jingman tang shu ïoh jingtip halor kane ka jingjia ba sngewsih.
Kine ki ophisar ki la ïathuh ba ki nongtrei ki la trei shitom baroh shimiet haduh ka por 4:00 baje mynstep ban ïoh sei ïa u Bah Marshall hynrei wat hapdeng ka jingtrei shitom kaba la neh arphew saw kynta kim shym la lap satia u.
U Bah Chyne u la ïathuh ba katkum ka jingïoh jingtip halor kane ka jingjia ka dei ha ka por 1:30 baje noh sngi bad u la ong ruh ba ka jingwad ïa u Bah Marshall kan dang bteng beit haduh ban da lap ïa u na ka jingshah tap ha ka synrum jaboh.
U la ïathuh ba ka Municipal ka la buh san tylli ki puh shilum ban kyndang ïa ka jaboh khnang ban lap ïa u Bah Marshall.
U la pyntip ba ha kane ka jaka thehñiut ha Marten ka jaboh ka ding ka meh beit wat haba ther u lapbah lapsan ruh na ka daw ka jingdon ka Methane Gas.
Ki nongtrei ka State Disaster Response Force (SDRF) hapoh ka jingïalam jong u 2nd in Command Bah B. Sahkhar ki la la hiar sha Marten ban wad ïa u Bah Marshall ryngkat ka jingïatreilang bad ki nongtrei jong ka Shillong Municipal Board, la ïathuh u Divisional Commandant jong ka Home Guards, Shillong Bah P.H Shylla.
“Ngi kyrmen ban ïohi ïa ki dak ki shin ban lapdien ïa u Bah Marshall bad ngi la suba ruh un im shuh hi ruh,” la ong u Bah Chyne.
Haba kylli, u Bah Chyne u la ïathuh ba ka jingtwa ka synrum jaboh ha Marten ka dei kaba ju naduh ki snem 2008-2009 shaneng. “Ka jingpynlong jaka thehñiut ha Marten ka long naduh u snem 1938, mynta ka la don 86 snem bad la shu theh shu theh ñiut bad kam don shuh ka jaka kaba lait,” u la bynrap.
“Ïa ki nongtam mar jot ngi la rejistar kyrteng da kaba ai ïa ki Identity Card bad ngi la pyrkhing bha ïa ka rung ka mih ha Marten. Ha ki por mynshwa wat ki khynnah rit ruh ki don, hynrei mynta ngi la khang bad manla ka taiew ngi ju don ka jingïalang bad kine ki nongtam mar jot ban batai ïa kaei kaba ngi dei ban leh bad ïa kaei kaba ngim dei ban leh. Hynrei wat hapdeng kine ki jingbthah ruh ki dang mih kum kine ki jingjia,” u la ong.
U la ïathuh ba ka Sorkar ka la tyrwa ban pynïakhlad ïa ka jaboh kaba don kumba shilak sanphew hajar ton khnang ban pynduna ïa ka jinglang ka jaboh ha Marten.
“Ïa ka tender ki la khot na ka Directorate jong ka tnat Urban Affairs bad hapoh 3-4 bnai ka lah sdang kata ka kam,”u la bynrap.
Kum ka jingsngewlem, u CEO bad u Executive Engineer ki la leit jngoh ïa ka ing jong u Bah Marshall bad ban ïakynduh ruh ïa ka kurim ka jong u bad ïa ki bahaing hasem ban pynpaw ïa ka jingsngewsih halor kane ka jingjia.
