Nongstoiñ, Rymphang 04: Ka jingthmu jong ka sorkar Meghalaya bad Assam ban pynkut noh ïa ka jingïakajia pud kaba la neh la palat sanphew snem, ka la sdang ban urlong ha ka jingïakren naduh jingsdang ïa ka wat kaba nyngkong. Hynrei, imat ha ka wat kaba ar, ka la kham jwat bad ka jingkylli ka long hato ka jingdawa ka seng ki Nepali, ka Lampi Anchalik Border Development Committee, ba ïa ki khat hynriew tylli ki shnong u CM Assam um dei ban khynñiat sha Meghalaya, kan urlong?
Lah ban pynkynmaw ba kane ka seng ki Nepali kaba don bynta lang da ki heh sorkar na Assam, naduh u Nailur jong u snem 2022, ka la dep ban phah da ka jingthoh sha u Himanta Biswa Sarma myntri rangbah ka Assam, ban dawa na u, ba ïa ki khat hynriew tylli ki shnong kiba don ha katei ka jaka um dei ban khynñiat sha Meghalaya.
Kitei ki shnong kiba katei ka Committee ka la kdew ha ka map ki kynthup ïa ki shnong Khasi bad Garo bad kitei ki shnong ki dei ka Hahim, Kampaduli, Bangjeng, Nawapara, Dronpara, Sohmarang, Nongma kaba ki khot ka Panbaripahar, Lower Lumpi (Langpih), Umtap, Lawbah (Harshanagar) Umali (Umwali), Umsing (Uwahsiang), Makoibari, Mawlan kaba ki khot (Katapara), Mawsikar kaba ki khot ka Upper Lumpi, Umbarot kaba la tip kum ka shnong Umbyrsit.
Katkum ka jingwad jingtip kaba bniah bha, la lap ba ka jingdawa jong katei ka Committee jong ki Nepali, ka dei halor ka nongrim ba ki don ki nongshong shnong na kitei ki shnong kiba dei ki Khasi, kiba la ïoh jingïarap na ka sorkar Assam kum ki skhim shna ïing, shna pynthor, ki skhim ha ka rep ka riang bad kiwei kiwei lyngba ka jinglong ksiang jong ki katto katne ki rangbah kiba kwah ban ïoh jingmyntoi ïalade.
Nalor kata ka surok rong na Kamphaduli shaduh Mawsikar (Upper Lumpi) bad ki ar tylli ki ktem pulit ka Lower Lumpi BOP bad ka Upper Lumpi BOP, ki dei ki maw nongrim kiba skhem kiba pynlong ïa katei ka Committee, ba kan dawa na u Myntri Rangbah ka Assam ba um dei ban pynhap ïa kitei ki shnong sha Meghalaya.
Lah ban pynkynmaw ba watla ïa ka wat kaba nyngkong ki ar ngut ki Myntri Rangbah ki la dep ban ïasoi ïa ka soskular. Hynrei kam shym la pynhun ïa ki nongshong shnong ka Jylla kiba la shah khynñiat jubor sha Assam bad ka la pynkhih win ruh ym tang ïa ki paitbah nongshong shnong ha khappud, hynrei ïa baroh ki paitbah ka jylla bad ïa ki sengbhalang, ha kaba ki la kynnoh ba katei ka jingïasoi ïa ka soskular pynbeit pud khlem da pan jingmut na ki nongsynshar hima, na ka KHADC bad na ki nongsynshar shnong ka dei ka jingleh donbor jong ka sorkar.
Nalor kata ïa kitei ki jaka kiba la dep ïa soi ïa ka soskular pynbeit pud, ym shym la don kano kano ka kynhun napoh ka jylla Assam, kaba dawa bad phah syndon da ka jingthoh sha u Myntri Rangbah ka jylla Assam ryngkat ka map kaba biang ryngkat ki kyrteng jong ki shnong kumba ka long ïa ka Langpih sector.
Hynrei, ha kaba ïadei bad ka jingthmu jong ki ar ngut ki Myntri Rangbah ban sdang noh ban pynbeit ïa ka wat ba ar, kata ïa ki shnong kiba hap ha ka Langpih sector, katei ka kynhun ki Nepali ka lah ban pynkhih win, lada u myntri rangbah ka Assam um kohnguh ïa ka jingdawa jong katei ka Committee.
