Wat hadien 16 snem dang ha suiñ ka jingpyntrei ïa ka Projek umbam na Greater Shillong WSS

Shillong, Rymphang 14 : Wat hadien 16 snem ka jingap, hynrei ka projek umbam ba la tip kum ka Greater Shillong Water Supply Scheme (GSWSS) phase-III) haduh mynta ka dang sahkut ha suiñ khlem pat lah ban pyntikna lano yn pyndep noh ïa ka.
Mynta wat ïa ka por ban pyndep ruh la rah biang da kaba kynnoh ba ka Hima Mawphlang haduh mynta kam pat ai ïa ka jaka na ka bynta ban tei ïa ka pumping station.
Katkum ka jingïathuh da u Myntri ka tnad PHE, Marcuise N Marak, ka jingdawa na ka Hima Mawphlang ka la nang ïai bun watla ka sorkar ka la pynpaw ïa ka jingkloi ban ai kam sha kumba 20 ngut ki nongshong shnong na katei ka thaiñ.
“Mynta ngi dang don ha ka lynti jong ka jingïakren bad ngi kyrmen ba ngin lah ban pynbeit noh shen,” ong u Myntri haba kren bad ki lad pathai khubor.
“Na ka lïang ka Hima ki don bun bha kiei kiei. Ki kwah ban ai kam bad ka sorkar ka la mynjur ïa ki ban ai kam ïa kumba 20 ngut ki nongshong shnong ha ka tnad. Ngi la phah ruh ka shithi sha ki ba kin phah noh ïa ki kyrteng hynrei haduh mynta kim pat phah satia,” u la ïathuh.
Halor ka jingkylli, u Myntri u ong ba ïa mynta ki dang ap sah ïa katei ka jingthoh na ka Hima bad tang shu ïoh pdiang ki la long kiba kloi ban thung kam noh.
“Ka jaka ba donkam na ka bynta ban shan ïa ka pumping station kaba ar kaban tan ïa ka um na ka wah sha ka jaka pynkhuid (treatment plant) ka long kumba 2 -3 hectare. Katei kadei ka jaka kaba ngi donkam na ka Hima Mawphlang ba kin ai ïangi,” u la ong.
Lah ban kdew ba ka jingpyntrei ïa kane ka projek ka la sdang naduh u snem 2008.
Shuh shuh u Myntri u la ong ruh ba ka sorkar mynta kam don lad shuh namar ba ka jaka hi ka dei jong ka Hima Mawphlang.
Nalorkata, u ong ruh ba kum u Myntri u ïai pyrshang bad na ka liang ki engineer ruh ki dang ïai pyrshang hynrei ka jingdawa jong ki, ka nang bun. “Kumta, kumno ngin leh, ngim don lad shuh namar ka jaka kadei ka jong ki hynrei la katta ruh ngi dang iai bteng ban ïa kren,” u la ong.