Shillong, Rymphang, 14: Ki Rangbah Shnong jong ki shnong bapher kiba hap hapoh ka Dorbar Diengiei ba la lamkhmat da u President Bah P.J Lyngdoh ha ka sngi Balang ki la kyrpad ïa u MLA jong ka Sohïong Constituency u Bah Synshar Kupar Roy Lyngdoh Thabah ba un wad ïa ki lad ki lynti ban pynïoh ïa ka mang tyngka na ka bynta ban siangrong noh ïa ka surok khyndew kaba pynïasoh na ka shnong Nongpathaw shaduh ka shnong Kyntonmynnar kaba jrong 2 kilomitar duna.
Kane ka jingkyrpad jong ki nongkitkam ka Dorbar Diengiei ka long hadien ba ki paidbah ki la ïakynduh mawsiang na ka jingdheng kali kaba ju neh jin haduh 3 bad 4 kynta manla ka sngi ha ka shnong Mawlaingut na ka daw ka jingieng jong ki trok kiba ïaid lynti lyngba ka surok Mawmaram, Mawmih shaduh Mawlyndep ter ter haduh ban da poi ha Lad Umsaw namarba ka dang don ka jingmaramot ïa ka jingkieng Damsite.
Kine ki nongïalam shnong ki la pynpaw ki don haduh 28 tylli ki shnong kiba hap hapoh ka Dorbar Diengiei kiba la donkam kyrkieh ban ïoh ïa ka surok kaba bha khnang ba kan pynsuk ïa ka leit ka wan bad ka rah ka rong.
“Lada siangrong noh ïa kane ka surok, ka jingïaid lynti kan long tang 2 kilomitar, hynrei mynta ngi hap ban ïaid lynti 7-8 kilomitar manla ka sngi,” la ong u Bah Lyngdoh. “Ngi kwah ïa u MLA ba un kren halor kane ha ka Dorbar Mang Tyngka jong ka Ingdorbar Thawaiñ,” u la ong.
“Bun ki paidbah kiba leit shim dawa ki ïakynduh jingeh namar ka jingdheng kali kaba ne da ki kynta ha surok Mawlaingut namar ka jingïaid jong ki trok. Ki kali kit nongpang, ki kali ba kit ïa ki longkmie ba armet sha shillong ki sahkut bad ki don ki khep ba ki longkmie ki kha khun hapoh kali,” ula ong bad bynrap, “lada siangrong noh ïa ka surok na Nongpathaw-Kyntonmynnar, kan pynsuk ruh ïa ki paidbah jong ka shnong Sohïong, Krang, Nongbsap ban leit sha sor Shillong namarba ka pynsuk bad ka jan bha na ka bynta jong ki.”
