Wat beh tang ka kam sorkar hynrei pyntbit ha ki laiñ trei kiba lah ban ai kam : Lahkmen Rymbui

Shillong, Jymmang 05 : U Myntri ka tnad Pule Puthi ka sorkar jylla Bah Lahkmen Rymbui u la kyntu ïa ki samla pule ba ha kane ka juk mynta kim dei eh ban beh tang ïa ka kam sorkar hynrei ba ki dei ban pyntbit ruh ïalade ha ki lain trei bapher bapher kiba ka sorkar na ka por sha ka por ka ju pynlong.
Ïa kane u Myntri u kren ha ka jingalang plie pyrda ïa ka Jubili Ksiar jong ka Nongsder Lower Primary School, Nongsder kaba don ha ki thain Pynursla ha ka jingrakhe kaba long ha ka sngi Nyngkong jong ka taiew.
Kum ka dak ka jingplie pyrda ïa kane ka Jubili Ksiar, u Myntri u la pynher ïa ka jubili ryngkat ka jingdonlang u MDC ka thain Bah Shemborlang Rynjah kum u Symbud Kongsan, nangta ki Ophisar na ka Sub Divisional School Education Officer, u Assistant Commissioner ka Pynursla Civil Sub-Division nalor ki nonghikai ba rim bad ba dang hikai, ki khynnah skul ba la pass na kane ka skul bad kiwei kiwei.
“Ki samla pule kim dei ban pule ban beh tang ïa ka ïa ka kam sorkar hynrei ban pyntbit ha ki laiñ trei kiba lah ban ai kam namar tang ka kam sorkar hi ka long kaba duna ban nujor bad ka jingdon pat ki samla ba leit pule,” u la ong da kaba bynrap ba ka sorkar jylla na ka por sha ka por ka ju pynlong ïa ki jingai jinghikai ha ki lain trei bapher bapher ban pyntbit ïa ki samla khnang ba kin lah pat ban ïohkam ne lah ban ieng ha la ki jong ki kjat.
Na ka liang u Symbud Kongsan, u Bah Shemborlang Rynjah u la kyntu khamtam ïa ki kmie ki kpa jong ki khynnah skul ba kin buddien ïa ka jinglong jingim ki khun bad ban pynthikna ba kin ai por man ka sngi ban ïakren ïa syllok naduh ba ki dang rit haduh ba kin da san. “Kaba sngewsih pat ba ha kine ki sngi kiba mynta, ki kmie ki kpa na ka daw ba ki salia ba ki khun ki thlia bad kylli bun ki jingkylli ki ai da ka mobile phone ïa ki khun khnang ba ki khun ruh kin ym thlia shuh, kane hi ka dei kaba ma bha ïa ka lawei ki khun,” u la kren bynñiaw.
Ha kaba ïadei bad ka dorkhas ba ka skul ka la aiti na ka liang u Myntri u la kular ban shim khia bad kyntu ïa ki nongïalam shnong bad ka Managing Committee jong ka skul ba kin wan kynduh khnang ba kin lah ban leh ïa kaba donkam.
Ha kane ka sngi la ïoh ruh ïa ka jingkren na u Rangbah Shnong uba dei ruh u Chairman jong ka School Managing Committee u Bah Phining Sohkhlet.