Ai jingïaroh u Rakkam halor ka project surok na Chokpot-Siju-Karukol ba kot 130 klur tyngka

Shillong, Jymmang 5: U MLA ka Rongara-Siju bad u Myntri sorkar barim u Rakkam A Sangma u la pdiang sngewbha ïa ka jingpynmih ïa ka tender na ka bynta ka projek surok Chokpot-Siju-Karukol kaba la ap slem bha, kaba la antad ba kan long kumba ?130 klur, da kaba khot ïa ka kum lad ban kyntiew ïa ka jingpyniasoh bad ka roi ka par ha ka thain.
Ha ka jingpyllait lyngba ka video ha ka sngi Ba-ar, u Sangma u la kdew ïa kane ka projek kum u “mawjam ban sah nam” hapoh ka jingïalam jong u Myntri Rangbah ka Jylla u Conrad K Sangma.
” Kane ka jingbei tyngka kan ai jingmyntoi shibun ïa ki briew jong ngi da kaba pynbha ïa ka jingïoh ïa ki jingshakri ba kongsan katba kan plie ruh ïa ka lad jngohkai pyrthei kaba khraw jong ki jaka kum ka Wari Chora, da kaba thaw ïa ki lad kamai kiba thymmai bad ai jingkyrshan kaba khlaiñ ïa ka ïoh ka kot jong ka thaiñ,” u la ong.
Haba ai jingiaroh ïa ka sorkar ba la ïalam da u Conrad bad ki tnad ba dei peit kiba la shimkhia ïa ka jingdawa kaba la slem bha, u Sangma u la pynpaw ka jingshaniah ba ïa ka projek yn pyndep ha ka por ba la buh katba dang pynneh ïa ka jinglong jingman.
U la pynthikna ruh ïa ka jingkyrshan ba pura bad ka jingïatreilang ban pynthikna ba ka jingpyntreikam ka ban ïaid beit ïaid ryntih bad ha ka por kaba biang na ka bynta ka jingmyntoi jong ki paidbah.