Nongpoh, Nailar 19: Ka shlem pule Ri-Bhoi College lyngba ka Entrepreneurship Development Centre (EDC) bad ka IQAC mynta ka sngi kala pynlong ïa ka prokram ai jinghikai kyrpang ïa ki samla pule halor ki lad sengkam sengjam halor ka phang ‘Exploring Opportunities’ ba kum ki samla kim dei ban ap tang haki kam sorkar hynrei ban ai mynsiem bad pynshlur ïaki ban sengkam lajong bad ban ïeng hala ki jong ki kjat.
Kane ka prokram ka dei kaba lai sngi lynter ban ai jinghikai halor ki lad sengkam sengjam (entrepreneurship) bad la sdang mynta ka sngi ha Ri Bhoi College.
U Deputy Commissioner ka Ri Bhoi, u Abhilash Baranwal u la wan ban shim bynta kum u kongsan ban plie ia kane ka prokram ai jinghikai bad la sakhi lang ruh da ka jingdon lang u E.C. Benny, Principal ka Ri Bhoi College, ka kong W. Blah, Principal Alpha Higher Secondary School, Nongpoh, ka kong W Nongkynrih IQAC Coordinator, lem bad ki samla pule na ki jaka pule bapher bapher ka Ri Bhoi.
Haba ai jingkren ha kane ka sngi kum u kongsan, u Deputy Commissioner ka Ri Bhoi u Abhilash Baranwal u la ai khublei ïa ka Ri Bhoi College kaba la shim ïa kane ka sienjam ban ai jinghikai sha ki samla halor ki lad sengkam sengjam lajong bad kum kine ki prokram ki long kiba donkam bha khnang ba ki khun samla kin ioh mynsiem ban ieng ha la ki kjat ban sengkam sengjam lajong ym ban khmih lynti tang haki kam sorkar.
Shuh shuh, u la kyntu ruh ïa ki samla pule kiba la wan ban shim bynta ha kane ka prokam ba kin pyndonkam hok ïa ki lad jinghikai ba ki la ioh lum jingtip na kane ka prokram ai jinghikai bad u kyrmen skhem ruh ba lada don kum kine ki prokram kan long shisha ka jingmyntoi ïa ki samla ba kin sngewthuh halor ka jingkordor ka sengkam sengjam lajong ha kum kane ka pyrthei kyrduh kam kyrduh jam, u la bynrap.
