Shillong, Lber 22: U Bah Adelbert Nongrum, MLA ka North Shillong, ha ka sngi Balang, u la wanrah ïa ka Bill ban bhah kyrpang na ka bynta ki samla pule kiba leit îa ki laiñ Doctor, Engineer bad kiwei kiwei de ki laiñ pule ba ju bhah da ka sorkar katkumn ka Reservation Policy.
Hynrei kane ka Bill jong u MLAka VPP ka la shah rem noh khlem da ïoh ïatai lyngba ka Voice Vote.
Haba wanrah ïa kane ka Bill, u Bah Adelbert u la ong ba ka jingbhah leit pule lyngba ka State Reservation Policy ka la ktah jur ïa ki samla namar ka jingnoh shiliang jong ka bad hadien ka jingphah pyntreikam lei lei ïa ka Roster System da ka ïingbishar ka la nang pynkulmar shuh shuh ïa ki Samla.
U la ong ba khnang ban lait na kine ki jingeh jong ki samla bad ban ailad ïa kiba dei hok ban ïoh kane ka Bill kan ailad ïa ka sorkar jylla ban bhah kyrpang ïa kiba leit pule napdeng ki samla trai jylla katkum ka jinglah ne ka merit jong ki. Nangta u la ong ruh dei ban bhah kyrpang na ka bynta ki samla kiba wan na ki longïing longsem kiba duk bad kumjuh ruh na ka bynta kito kiba don jingduna ki dkhot met.
Hadien ba u Bah Adelbert u la batai lyngkot ïa kane ka Bil, u Lamphang ka ïingdorbar, u Thomas Sangma, u la pan ïa ka jingmynjur jong ka ïingdorbar na ka bynta ban ïatai ïa kane ka Bill ne ka aiñ rew kumba ïa ong, ka liang kaba pyrshah ïa ka Bill ka la jop da ka sur ne ka voice vote.
