Shillong, Nailar 22 : Ka long ka burom kaba bad ka jingsarong kaba khraw ïa ka jylla ha kaba ki arngut shi para trai kiba dei ki nongïalehkai Muay Thai ki la wanrah takma ïa ka jylla bad ïa ka ri India na ka lympung ïalehkai Muay Thai (Youth IFMA Championship) kaba la long ha Kuala Lumpur, Malaysia naduh ka 9 haduh ka 21 tarik Nailar 2022.
Kitei ki arngut ki nongïalehkai Muay Thai kiba dei na Umsning ki kynthup ïa ka Mary Christine Wriang kaba la khur ïa ka takma rupa bad takma rnong na ka kyrdan ïakhun kiba 13 snem ha ka jingkhia ba 38kg bad ka Alphonsa Wriang kaba khur ïa ka takma rnong ha ka kyrdan ïakhun kiba 14-15 snem ha ka jingkhia kaba 36kg.
Ka Mary Christine Wriang ka la khur ïa ka takma rupa hadien ba ka la rem noh ha ka thei ïalehkai jong ka Phillipines ha ka jingïakhun final bad ïa ka takma rnong ha ka jingïalehkai Waikru katba ka Alphonsa Wriang ka la khur ïa ka takma rnong hadien ba ka la rem noh ha ka jingïalehkai quarterfinal ha ka thei ïalehkai jong ka Ifma1.
Nalor kitei ki arngut, ki lai ngut kiba la leit ban ïashim bynta ha katei ka lympung hapoh ka jingïalam u Bah Angelus Sun, u President ka Muay Thai Association of Meghalaya (MTAM) kiba khlem poi sha ka thong jong ka jingjop ha kane ka kynti ki kynthup ïa ka Naphilawanbet Nongspung kaba ïakhun ha ka kyrdan kiba 14 snem ha ka jingkhia ba 45kg, u Everest Lyngdoh ha ka liang kiba 15 snem ha ka jingkhia kaba 45kg bad u Bansahnam Warkhyllew ha ka kyrdan ba 15 snem bad ha ka jingkhia kaba 45kg.
Na ka liang u Bah Angelus Sun haba ïakren bad ki nongthoh khubor ha ka sngi Nyngkong ha Shillong Press Club u la pynpaw ka jing-sngewkmen ba kitei ki arngut ki la lah ban khur ïa ki takma watla hapdeng ki jingeh ba ki ïakynduh na ka jingbym biang ki jaka kilan met. U la pynpaw ka jingsngewnguh ïa ka sorkar jylla kaba la kloi ban ïarap ha ka liang ka pisa ha ka jingleit ïashim bynta jong ki sha Malysia.
