Shillong, Nailar 17: Kan long ka burom ïa ka jylla ba uwei u nongshna phlim na rilum Garo u Dominic Sangma ula wanrah nam bad burom da kaba ïoh ïa ka khusnam Best Director Critic Choice Award na ka bynta ka phlim ka jong u kaba la ai kyrteng Rapture (Rimdogittanga) ha ka Indian Film Festival Melbourne, Australia.
Ka khubor ka ïathuh ba ïa kane ka Festival la pynlong naduh ka 15 tarik u Nailar haduh ka 25 tarik u Nailar, 2024.
Une u nongshna phlim Garo ula jop da kaba ïakhun pyrshah ïa ki nongshna phlim kiba pawnam kum Kiran Rao ïa ka phlim Lapata Ladies, Hemant Rao bad Diwa Shah ïa ka Bahadur.
Ka phlim “Rapture” ka la pynshohbiej ïa ki nongpeitkai ha kaba la pyni ïa ka jingïaid lynti ha ki bynta jong ki lum Garo jong ka Meghalaya, kaba don ruh ïa ka jingïadei kaba jylliew hapdeng ka jinglong ba sngewrit bad ka jingshah shitom hapoh ka shnong kaba don ha nongkyndong.
La ong ba ïa kane ka phlim ‘Rapture’ dang pyni mynta ha Tura ha ka Auditorium jong ka District Tura bad yn pyni ïa ka haduh ka 25 tarik u Nailar.
Ka Rapture, kaba dei ka phlim ha ka ktien Garo, ka ïathuh khana shaphang uwei u khynnah shynrang uba dang 10 snem ka rta uba ïaleh pyrshah ïa ka jingpang Night Blindness ne ka jingbym lah ban ïohi ha ka por miet bad ula mad ïa ka jingeh kaba khraw namar ka jingshyrkhei jong ki kam rahbor ïa ki khynnah. Kane ka phlim ka ngam jylliew ruh ha kaba ïadei bad ka kolshor bad ka rukom ngeit ki jaidbynriew Garo.
Ïa kane ka phlim la pyni nyngkong eh ha u bnai Lber 2024 ha ki 100 tylli ki jaka pyni phlim kiba don ha kylleng ka ri France.
La ïathuh ruh ba ka phlim jong u Dominic Sangma kaba la tip kum ka ‘MA.AMA’ ka la long ka phlim Garo ba nyngkong eh ban ïoh ïa ka National Award. Katei ka phlim ka la ïoh ïa ka khusnam Best Cinematography Award ha ka 22nd Shanghai International Film Festival ha u snem 2019 bad ka la ïoh ruh ïa ka khusnam Best Film ha ka 14th International Film Festival ha Thrissur.
Ka ‘Rapture’ kadei ka phlim ka baar ka jong u Dominic Sangma bad ka la kylla long ka jingjop kaba khraw ha ki rynsan Film Festival. La pyni pyrthei ïa ka ha ka Locarno Film Festival, ka la jop ïa ka khusnam Best Cultural Diversity ha ka Asian Pacific Screen Awards ha Brisbane, Australia, ka la ïoh ïa ka NETPAC Award ha MAMI, Mumbai, ka la ïoh ruh ïa ka ‘Honorable Mention Award’ ha ka Indian Film Festival ha Los Angeles.
U Sangma ula don ha ka kynhun bishar na ka bynta ka Indian Panorama, ka IFFI, bad ka Guwahati International Short Film and Documentary Film Festival bad ula don ruh ha ka Preview Committee jong ka International Film Festival of India bad ula shah jied ruh na ka bynta ka Berlinale Talents 2020.
