Shillong, Nailar 17: U Jingjang M. Marak u lah ban long u kyrtong jong ka seng Congress ha kane ka election MLA shiteng samoi ka ban long ha Gambegre constituency.
U Marak uba dei u paralok ba ïajan bha bad u MP ka Tura u Saleng Sangma u la long tang ma u ruh marwei uba la pan ka tiket napoh ka seng Congress ha kane ka elelction ban wan.
Ïa ka application jong u la dep ban phah da ka West Garo Hills District Congress Committee sha ki nongïalam ba halor jong ka seng Congress ha ka jylla.
Katkum ki tyllong khubor, la iathuh ba ïa ka application ba la pynskhem da ka Meghalaya Pradesh Congress Committee shen yn sa phah noh sha ka Congress high command na ka bynta ban shim ïa ka rai kaba khatduh.
Lah ban kdew ba ka shuki MLA napoh Gambegre ka la sah thylli noh hadien ba u MLA ka Congress u Saleng A. Sangma u la iehnoh ïa ka kam ha ka 10 tarik u Jylliew hadien ba u la shah jied kum u MP ka Lok Sabha na Tura parliamentary seat.
Hynrei haduh mynta ka Election Commission kam pat shym la pynbna ïa ka tarik na ka bynta kane ka election shiteng samoi. Ïa ka election shiteng samoi dei ban pynlong hapoh ki 6 bnai kumta ka election kan lah ban long la kumno kumno ha u bnai Risaw mynta u snem.
Kham ha shwa na ka liang ka NPP ka la pynbna ban pynïeng da ka kurim u u Myntri Rangbah ka jylla u Conrad Sangma ka Mehtab Chandee Sangma kum ka kyrtong ka party napoh ka Gambegre by-election.
