Wanrah ki nongrep ïa ki mar rep napoh ki lai tylli ki Block ka West Jaiñtia Hills
Jowai, Naiwieng 23: Ka District Horticulture Officer, West Jaiñtia Hills District, ha ka 22 tarik mynta u bnai ka la pynlong ïa ka ïew pyni nam ïa ki mar rep mariang kaba la tip kum ka Horticulture Exhibition Under MIDH Scheme 2023-24 ha madan Marian Hill Higher Secondary School, Jowai.
U MLA ka Jowai u Bah Wailadmiki Shylla ula long u kongsan ryngkat ka jingïadonlang ka kong D.C. Sohtun, MAS Director of Horticulture Meghalaya Shillong bad kiwei.
Ha kane ka ïew pyniñam ïa ki mar rep mar riang la wan na ki shnong bapher bapher jong ki lai tylli ki Block kiba don West Jaiñtia kiba kynthup ïa ka Laskeiñ, Thadlaskeiñ bad Amlarem Block.
Ha kane ka ïew ïakop pyni nam mynta ka sngi la wanrah ïa ki jait jhur, jait syntiew, ki symbai jhur, ki jait syiar bapher bapher na ki shnong bapher bapher na kitei ki lai tylli ki Block, ha kane ka sngi la sam ruh ia ki khusnam sha ki nongjop ha kane ka jingpyninam ïa ki mar rep jong ki.
U Kongsan u ma Wailad haba kren ula ai ka jingïaroh ïa ka tnat jong kane ka ophis kaba la lah ban pynlong ïa kane ka ïew pyni nam kaba long kaba donkam ïa ki nongrep ym tang ba kin pyni ïa ka jingbha ïa ki mar jong ki hynrei kin ïoh ka lad ban ïa phylliew jingmut bad ki nongtrei kane ka tnat kaba ïa dei bad ka rep ka riang.
U ma Wailad u la kyntu ïa ki nongrep ba kiba don ki khun kiba la nang la stad ruh ki dei ban ai lad ne hikai ïa ki ban nang ïa ka kam rep kam riang ne phah leit pule haka kam rep kum ba long sha kiwei pat ki jylla.
Ka kong Sohtun haba kren ha kane jingïakop pyninam ïa ki jingthung jingtep ka la ong ba don shi bun ki skim bapher bapher ne ki lad jingïarap lyngba kane ka tnat treikam jong ka sorkar kaba ïa dei bad ki nongrep, kumta ka kyntu ïa ki nongrep ba ki dei ban wan mih sha ka ophis jong kane ka tnat kaba doh ha ki District ne hapoh ki Block jong ki, da kaba ki lah ban ïa kynduh ïa ki sahep bad ki nongtrei kane ka tant na ka bynta ki jingiarap bapher bapher.
Mynta ka sngi la ïoh ruh ïa ki jingkren na u bah S. Rani Director Horticulture Officer WJHD, bah Mutshwa Thabah Vice Chairman EARMACS, ma R. Lamare Assistant Director Officer West Jaiñtia Hills District rynkat ka jingïadonlang kiwei de ki officer bad nongtrei kane ka tnat.