Wanrah ka FM ïa ka mang tyngka ba 2 lak klur tyngka, yn hiar dor ki dawai Cancer bad Mobile

New Delhi, Naitung 23: Ka Myntri ka tnad pla tyngka jong ka ka Nirmala Sitharaman, mynta ka sngi ka la wanrah ïa ka mang tyngka jong u snem 2023- ’24.
Ha kane ka mang tyngka kaba nyngkong eh jong ka sorkar NDA 3.0. Ha kane ka mang tyngka, ka Niramala ka la ïathuh ba ka sorkar ka pylleit jingmut na ka bynta ki briew kiba duk, ki longkmie, ki samla bad ki nongrep.
Shuh shuh ka la ong ba ka mang tyngka kan peit ruh na ka bynta ban kyntiew ïa ka ïoh ka kot kaba mynta ka la jan poi sha ka 4 percent ha kaba ka la ong ba ka ïoh ka kot ka la nang tyngshaiñ katba nang mih ki sngi.
Ka Niramala ka la ong ruh ba ka sorkar kan peit ba ki jhur ki jhep kidei ban poi sha ki ïew ki hat bad ka sorkar kan wanrah ïa ka support price na ka bynta ki mar rep. Nangta kan bteng ruh ïa ka jingai khaw ei lyngba u khaw reshon kaba la wanrah ka jingmyntoi kumba 80 klur ngut ki nong India.
Ha kane ka mang tyngka ka Myntri ka la ong ruh ba lyngba u Myntri Rangbah Duh yn wanrah ïa ki skhim ban myntoi kumba 4 klur ngut ki samla ha ka ri, ka ban ïarap ïa ki ha ka liang ka ïoh kam ïoh jam ha kine ki san snem ban wan.
Lyngba kane ka mang tyngka ka sorkar ka la pynhiar ruh ïa ka khahna na ka bynta ki dawai sumar pang cancer bad kumjuh ruh la pynhiar ïa ka khajna jong ki mobile phone.