Wanrah burom ka samla Lorenza Songthiang ïa ka Jylla na ka lympung ïalehkai ha Uzbekistan

Shillong, Jymmang 05 : Ka samla Lorenza Songthiang ka la wanrah nam bad burom ïa la ka jong ka Jylla Meghalaya bad ïa ka ri India lyngba ka takma Rnong ha ka jingleit mihkhmat jong ka ïa la ka jong ka ri India ha ka lympung ïalehkai Pankration World Championship kaba la pynlong ha Yunusobod Sports Mausi, Tashkent, Uzbekistan ha ka 2 tarik haduh ka 4 tarik Jymmang 2023.
Kane ka jingïoh khur takma kadei ruh ka sien ba nyngkong ha ka history jong ka jylla Meghalaya ha kaba kum kane ka jait jingïalehkai ïakura bad ïalympat ne ka Pankration ban ïoh khur takma. Ka Lorenza Songthiang kadei ka samla ba dang pule ïa ka B.A 4th Semester ha Shillong College bad ba shong ba sah ha Laitkor Kynton-U-Mon ka la leit ban ïashim bynta ha katei ka Championship ha ryngkat ki khyndai ngut kiwei pat ki paralok.
Kiwei pat ki paralok ki kynthup u Vasu uba ïakhun ha ka kyrdan ba 84 kg uba dei na Karnataka, u Abdul ha ka kyrdan ba100+ kg bad ka Yogita ha ka kyrdan ba 70 kg kiba dei na Maharashtra, kine ruh ki ïoh khur ïa ka takma Rnong na ka bynta la ka jong ka ri India.
Halor katei jingjop takma, Ka samla Lorenza Songthiang na ka Jylla Meghalaya, u Aditya na Maharashtra ha ryngkat ka Yogita ki la ïoh rung sha ka World Combat Games ha ka jingïalehkai Pankration kaban long ha Riyadh, Saudi Arabia kaban sa long ha u Risaw mynta u snem.
Na ka liang ka All Meghalaya Traditional Wrestling and Pankration Association (AMTW&PA) kaba dei ka Assocaition ba dang shu thaw thymmai ka la pynpaw ka jingsngewnguh shi katdei eh ïa u President bad General Secretary jong ka Khasi Student Union (KSU) kiba la kyrkhu kyrdoh ïa ka samla Lorenza Songthiang shuwa ba kan leit ïakhun bad ai ka jingkyrshan ïa ka Association.
Ka Meghalaya School of Martial Arts (MSMA) ka pynrem ïa kito kiba kam ba kidei ki nongïalam bad kumjuh ruh ïa kito ki briew kibym sngewthuh ïa ka dor jong ka jingïalehkai Martialarts bad kibym ju ai ka jingkyrshan lane ai mynsiem ïa ki nongïalehkai kiba mihkhmat ïa ka Jylla bad ïa ka ri ha ki International bad World Championships. Ha kajuh ka por ka MSMA ka pynpaw ka jingsngewkmen bad kyrkhu kyrdoh ïa ka samla Lorenza Songthiang bad ïa kiwei pat kiba la jop takma ba kin nang kiew shaphrang ha ka lawei ïalehkai ka jong ki.