Shillong, Risaw 15 : U Myntri Rangbah ka jylla u Conrad K Sangma u la kyntait ïa ki jingkynnoh ba don ka jingtih Uranium ha Garo Hills, da kaba ong ba kam don kano kano ka sabut ne ka jingtip ban kyrshan ïa kum kine ki jingkynnoh.
“Kam don kano kum kata ka kam ne kano kano ka jingpynshisha lane ka jingtip kaba paw ba ka don kumta ka kam,” ong u Myntri Rangbah haba kren bad ki lad pathai khubor ha ka sngi ha ka sngi Balang haba jubab ïa ki jingkynnoh ba dang shen ba la pynpaw da u MDC ka BJP na Tura u Bernard N Marak.
U Myntri Rangbah u la kyntu ïa ki nongïalam kiba kynnoh ba kin wan shakhmat da ki jingtip ba bniah bad ki sakhi, da kaba kular ba ka sorkar kan shimkhia mardor lada lap ïa ki sakhi.
“Ki nongïalam kiba don ka jingkitkhlieh kim dei ban shu wanrah ïa ki jingkren tang namar ba ki kwah ban ïoh pynpaw pyrthei ne lehse tang ban pynmih ïa ka jingkren jong ngi,” u la ong haba bynrap “Lada ka long kumta, te thikna ba ka dei ka mat kaba donkam ban sngewkhia bad lada ka long kumta, ai ba kin mih shakhmat bad ki jingtip ba bniah bad ki jingpynshisha ba thikna ba lada don kano kano ka jingleh kaba kum kata ka sorkar Meghalaya hi kan dei kaba nyngkong ban tuklar.”
Haba pynkynmaw biang ïa ka rai ba skhem jong ka sorkar pyrshah ïa ka jingtih uranium, u Conrad Sangma u la ong, “Nga la pynpaw shai bha ïa ka nongrim jong ngi ba ngi long kiba skhem ba ka jingtih uranium kam dei ban ïoh jaka.”
Tangba u ong pat, “Ki lah ban don ki jingjia ha kaba katto katne ki jingjia ki lah ban don hangta, kiba lah ban nym poi sha ka jingtip jong ka Sorkar, kumta lada ki don bad lada ki sakhi ki don bad lada ki jingtip ki don, te sngewbha ai ïa kata ha ngi ngin shim ïa ki sienjam kiba mardor.”
