Wanpoi ka Dongmusa ha Jowai, mynta yn plie pyrda ïa ka 6th Meghalaya Games

Jowai, Kyllalyngkot 20: Ka Dongmusa jong ka 6th Meghalaya Games 2025 ba la ap khmihlynti kaba la dep ban ïaid lynti haduh 360 kilo mitar naduh Tura, Shillong ka la wanpoi ha ha nongbah Jowai ha ka 20 tarik u Kyllalyngkot, 2025 (sngi Nyngkong) bad la pdiang sngewbha ïa ka na Hyper Fuse Cafe Chahtngit shuwa ban rah pat ïa ka ha Dorbar Hall ka Loomkyrwiang Jowai ban buh ïa ka na ka bynta ki paidbah kiba kwah ban wan peit bad sakhi ïa ka.
Ha kane ka sngi la donlang naduh u MLA ma Wailadmiki Shylla, Working President bah John F Kharshiiing, Vice President MSOA and Chairperson of the reception Committee of State Level, Secretary sha ka sorkar jylla kong Matsiewdor, War Nongbri, General Secretary MSOA bah F.Paiat, u Rangbah Shnong ka Lumkyrwiang ma L. Laloo nalor kiwei de.
Ïa ka jingïaid rally la sdang na Hyperfuse Café, Chahtngit da kaba ïaid lyngba ka Iawmusiang, Mission Compound bad pynkut ka Dorbar Hall ka Loomkyrwaing bala rah ïaka da ka Athlete ka Heimonki Khaii bad u Golfer u Jason Kerchwami Passah.
Mynta ka 21 tarik u Kyllalyngkot 2025 yn sa ïoh ban plie pyrda ïa ka 6th Meghalaya Games 2025 haka por janmiet ha Wahiajer Stadium da u kongsan uba dei ruh u Myntri Rangbah ka jylla u Conrad K Sangma, haka jingdonlang ki Symbud Myntri Rangbah u ma Sniawbhalang Dhar, Bah Prestone Tynsong, u myntri ka tnad ïalehkai Bah Shakliar Warjri, nalor kiwei de.
Ha kane ka 6th Meghalaya Games 2025 ki nongïashim bynta ki don haduh 3500 ngut ki athletes ki ban ïaknieh ïa ki 1600 tylli ki medals ha kylleng ki 23 tylli ki jaka ïalehkai, kynthup ïa ar tylli ha Shillong bad Laitkor bad ka long ruh ka sien kaba nyngkong haduh 7 ngut ki Para-athletes kin wan shim bynta saw ha ka jingïakop siat suloi (pistol and rifles) kiba kynthup saw ki kynthei bad lai ngut ki shynrang.
Hynne ka sngi la sdang ïa ki jingïalehkai bapher bapher haka juh ka por na ka liang ka Meghalaya State Olympic Association bad ka Meghalaya Sports Climbing and Mountaineering Association kila plie ïa ka Climbing Wall ba nyngkong eh hapoh ka District ïa u ribon la khap da u ma Wailadmiki Shylla MLA jong ka thaiñ.