Shillong, Nohprah 29: Ka kynhun ïalehkai kriket jong ka Meghalaya ka la kylla long ka kynhun ba nyngkong ban jam sha ka final ha ka U-16 boys’ Vijay Merchant Trophy da kaba pynliem ïa ka Nagaland da 72 ron ha ka jingïakhun kaba la long ha Bhubaneswar hynnin ka Sngi.
Ka Meghalaya kan ïakynduh ïa ka Manipur lane ïa ka Mizoram ha ka jingïaknieh namlahduh, katba ka jingïakhun semi final ka dang ïaid.
Haba phai sha ka jingïalehkai, u Apandanka Marak u la lah ban bah lyngkor ban kyrshan ïa ka kynhun da kaba khur haduh 5/45 na ki 11 over kiba u kawang, bad ka Nagaland ka la shah pynhap noh ha ka inning kaba ar da tang 92.
U Apandanka u la ïoh ban pynkut da 6/40 ha ka inning ba nyngkong kaba la pynïoh ïa u haduh 11/85 ha baroh ar Inning bad ïohnam rangkawangbol ba kynsai jong ka Meghalaya lyngba kitei ki Inning.
Haba phaidien, hynnin ka sngi Balang ka Meghalaya ka la jop ïa ka jingkynting (toss) bad jied ban tied nyngkong hynrei ka la shah pynhap baroh hadien ba kynjoh sha ka 123. Ka la pynkut ïa ka Nagaland da tang 83 ron bad kamai 22 ron ha ka inning tied kaba ar.
Katba hynne ka Sngi Palei, u Aashish Kumar Lohar u la tied 57 ron bad na ka liang ka Meghalaya ka la ïoh ban kynjoh sha ka 124 shuwa ban hap baroh ki wicket. Na ka liang jong u Aashish ruh u la lah ban ïalehkai bha bad kamai 34 ron na bynta ka kynhun ha ka inning ba nyngkong.Ma u lem bad u Gaurav Jyoti Thakuria (18) ki la kyntiew 57 ron shuwa ban hap u wicket ba hynriew kaba la ïarap ïa ka kynhun ha ka por ba sahdien da 47/5.
Lyngba ki 40-ron ba ka kynhun ka la ïoh lamkhmat na ka Inning ba nyngkong, ka Meghalaya ka la buh 165 ïa ka Nagaland ban jop. Hynrei kane ka ron ka la biang ïa ka kynhun ban khur namjop ha kaba ka Nagaland ka la shah pynhap lut baroh ki wicket da tang 92 ron.
U wicket ba khadduh ban shah pynhap dei ha u Thakuria (1/2 naki 2.4 over) katba u Paisal Ali (1/22 naki 4).
Ka Meghalaya mynta kan hap ap ïa ka kynhun ban ïakhun ha ka final napdeng ka- Manipur lane Mizoram.
