Vijay Merchant Trophy: Da kaba seisoh sdang ka Meghalaya ïa ka jingïakhun pyrshah ïa ka Mizoram

Shillong, Nohprah 16: Ka kynhun ïalehkai jong ka Meghalaya ka la sdang ïa ka sngi ïakhun ba nyngkong da kaba seisoh pyrshah ïa ka Mizoram ha ka lympung ïalehkai U-16 boys’ Vijay Merchant Trophy kaba la long ha Cuttack hynne ka Sngi, hadien ba ka pynhap noh ïa ka liang pyrshah da tang 179 bad kamai 137/4 shuwa ban khylliap.
Ka Meghalaya kan sa sdang mynta ka sngi ban pyndep ïa ka Inning ba dang sah bad ka donkam satang 42 ron ban lamkhmat ïa ka jingïalehkai.
Ka kynhun ka la lah ban ïalehkai khambha ha baroh liang, ka tied bad ka bol na u Dipayan Nandi bad u Gaurav Jyoti Thakuria.
Ha ka jingïakynting (toss) ka Mizoram ka la jop bad jied ban tied nyngkong, hynrei u Thakuria u la lah ban khanglad bad long ka jingma ïa ki player ka liang pyrshah da kaba khur haduh 5/58 naki 17.1 over ki jong u. U Apandanka Marak u la ïoh ban khur 2/23 naki 12 bad u Manthan Gupta 1/38 naki 12.
Dei tang u kapten ka kynhun Mizoram, u Peka, u ba la lah ban ïarap kyntiew ron na bynta ka kynhun da 102 naki 136 bol, kiba kynthup 20 tylli ki boundary.
Haba dei sa ka pali jong ka Meghalaya ban tied, ka kynhun ka la duh ïa u wicket ba nyngkong dang kloi bad ka la hap ban shaniah tylli ha u Dipayan ban pyntyllun ïa ka inning. U la lah ban neh haduh kaba kut jong sngi ïakhun ba nyngkong da 59 naki 97 bol (12x4s) hadien ba la ïoh jingkyrshan ryngkat bad u Gaurav Narleng (16 naki 15), Heiyomiki Ryngkhlem (26 naki 53) bad u Thakuria (12 not out naki 20).