Nongstoií, Nohprah 16: Ka West Khasi Hills District Badminton Association [WKHDBA] ka la pynhap pyrda noh ïa ka lympung lehkai kaba la tip da ka Inter Office Badminton Tournament 2023 ha ka 15 tarik Nohprah kaba hap ha ka Sngi Thohdieng bad ïa ka namlahduh la ïohrah da ka kynhun na ka tnat PWD-I, katba ka PHE-A ka la wan ba ar.
Kane ka lympung ba la pynïaid da ka WKHDBA la pynlong ar sngi lynter hapoh ka Indoor Stadium kaba ha New Nongstoin bad la plie pyrda da u Bah V, Swer-ADC jong ka West Khasi Hills.
Ki nongïashimbynta ha kane ka jingïakop la phiah ha ki san kyrdan, 10 tylli kiba ïalehkai ha ka Team Event, 7 kynhun ha ka Men’s Double, 5 kynhun ha ka Mixed Double, 4 ngut ha ka Men’s Single, 5 ngut ha ka kyrdan jong ki Ophisar (Men’s Single), bad haba kyllumlang ki don haduh 12 tylli ki tnad treikam ka sorkar kiba hap hapoh katei ka District kiba la wan shimbynta.
Haba phai sha ka jingïakhun para marwei ha ka Open Category (Men’s Single) la jop da u Gilbert Wahlang katba ïa ka kyrdan ba ar la khur da u Banteilang Lyngdoh.
Ha ka jingïalehkai shijur (mixed double) ïa ka namjop la khur da u Bentei Lyngdoh bad ka Wandashisha Lyngdoh, katba u Dr.LL Mawsor & ka WL Nonglait ki la rem bad wan kyrdan ba ar.
Haba phai pat sha ka kyrdan ïalehkai jong ki Ophisar, ïa ka namjop la khur da u T,Diengngan katba ïa ka nam ba ar la khur da u Dr.LL Mawsor.
Ha kane ka sngi pynkut ïa kane ka lympung la wan khylliap pyrda da u Bah Gilbert J. Sangriang-AEE Mechanical Engineer Department of Agriculture kum u Kongsan ha ka jingïadonlang ruh ki dkhot nongkitkam ka synjuk lem bad kiwei kiwei kiba la ïoh bynta ban sam khusnam sha ki nongjop.
