Shillong, K’ Lyngkot 03: Uwei u nongshong shnong ka kawei ka shnong ha West Garo Hills u la phah ka jingujor ba ha ka 14 tarik u Nailar, 2023, u la aiti ïa ka jingdengkti kaba da ka ksiar sha ka tnga jong u bad kumjuh ruh kumba 8.880 gram ka ksiar sha uwei uba kyrteng u Biswajit Tapadar, Proprietor Ujjala Jewelers ba un pynwandur biang ïa ka jingdeng ba kordor.
Ha ka 14 tarik u Nailar, 2024, une uba la ujor u la aiti biang sa kawei ka jingdeng ksiar kaba khia 10.020 gram sha utei u juh u briew ha ryngkat bad ka pisa kaba long T. 22,000/- ba un shna biang da kajuh ka jingpynwandur kaba long kumba rim bad ïa kitei ki ksiar la dei ban pynpoi ha ka 29 tarik u bnai Risaw, 2024. Hynrei haduh mynta la shem ba katei ka dukan shna ksiar ka la khang haduh mynta.
Ha kawei pat ka jingjia ka khubor ba la ïoh na ki pulit la ïathuh ba u Johnstar N Sangma u la phah ka jingujor ba ha ka 27 tarik u Nohprah ha ka por kumba 6.30 baje mymiet, kumba 6 ngut ki runar bym lah ban ithuh kiba la la don ba ki tiar pynmynsaw ki la pynïeng ïa ka thuk thuk jong u ha 13 mer (WGH) bad ki knieh jubor ïa ka pisa jong u kaba la poi haduh T. 90,000/-.
Ha kawei pat ka jingjia ki pulit ki la ïathuh ba ha ka 28 tarik u Nohprah, u Lokash Sangma u la wanmih hapoh ka Resubelpara PS (NGH) bad da ka ktien u la pyntip ba ki runar bym lah ban ithuh ki la tuh ïa ka thuk thuk jong u kaba don u nombar ML-13A-6351 napoh Mendipathar Bazar (NGH).
