Shillong, Jylliew 09: Ki pulit ki la ïathuh ba u Vimal Pasari uba na Guwahati, Assam, u la phah ka jingujor ba ha ka 3 tarik mynta u bnai u la rung hapoh ka jingïamynjur bad kawei ka M/s Starlight Technologies Ltd., na ka bynta ban thep ïa ki Optical Fiber Cable (OFC) ha Baghmara-Rongara Stretch (SGH), bad u la thep ruh ka pisa kumba T. 10.5 lak, ban pynbiang ïa ki nongtrei, ki tiar ki tar bad kiwei ki jingdonkam bad la lah ruh ban pyndep ban thep ïa ki cable kumba 4-5 km (approx.,) na katei ka kam ba la ïamynjur.
Hynrei utei uba la ujor pat u la sngewthuh ba ka M/s Starlight Technologies Ltd., la kynnoh ba ka la rung ïa ka jingïamynjur bad ka third party ban pyntrei ïa katei hi kajuh ka kam, khlem da ai jingpynbna kaba ha shwa ne ban don ka jingïakren bad u, ha kaba kane ka la wanrah ïa ka jingduhnong kaba khraw ka pisa jong u bad kaba la ktah bha ruh ïa u.
