Shillong, Nohprah 13: Uwei u nongshong shnong ka nongbah Shillong u la phah ka jingujor ba ha ka 10 tarik u Naiwieng, 2024, u la ïohpdiang shibun ki phone call, ha kaba utei uba phone u la pynithuh ïalade kum u Abhishek Sharma, uba kam ba udei napoh ka Telecom Department bad u la ïathuh ïa u ba u la ïohpdiang ïa kumba 17 tylli ki jingujor pyrshah ïa kawei ka mobile number kaba la kynnoh ba la ai ha ka kyrteng jong uba la ujor, halor ki jingpynbna ba long beaiñ bad ki jingshah byrngem ha kiba phone ïa u.
Kham hadien utei uba la ujor u la ïohpdiang sa kawei pat ka phone call na uwei u ba ai kyrteng u Vinoy Kumar Choubey, uba la kam ba udei u Sub-Inspector jong ki pulit ka Mumbai Police Station ha kaba u la bthah ïa u ba thep ka pisa kumba T. 2 lak ban ïoh sdang ïa ka jingtohkit khnang ban pynthikna bad ban sakhi ba une uba la ujor u dei u lanot bad u la ong ruh ba ïa kane ka pisa yn sa pynphai biang hadien 72 kynta.
Ha ka 19 tarik u Naiwieng, 2024, utei uba la ujor u la ïohpdiang sa kawei pat ka phone call na utei u Sub-Inspector ba la kynnoh ba u dei u pulit ka Mumbai Police Station, ha kaba utei u ophisar, la kynnoh ba u la byrngem ban wan kem ïa u ba ujor, lada ym lah ban siew sa kawei pat ka pisa kaba la kot sha ka T. 6 lak. Kham hadien utei uba la ujor u la sngewthuh ba u la shah thok lyngba kine ki phone call.
