Shillong, Nailur 05: U Commissioner & Secretary ba khmih ïa ka Public Health Engineering (PHE) u Syed Md Andaleeb Razi ha ka sngi Palei ba baroh ki jingkheiñ bad ki kaiphod haba ïadei bad ka Jal Jeevan Mission (JJM) ba la aiti da ka Public Health Engineering Department ka la don ha ka rynsan paidbah halor ka JJM-IMIS portal bad lah ban pynshisha shimet bad na ka liang ki paidbah ruh ki lah ban ujor ha ka CM-CONNECT halor ka jingdkoh ka jingpyntreikam ïa ka JJM.
Ïa kane u la kynthoh halor ka jingkheiñ ba kynnoh ba la aiti da ki kaiphod ki bym shisha sha ka sorkar pdeng halor ka Jal Jeevan Mission ha jylla Meghalaya.
U la ong ba ka sorkar pdeng manla ka por ka la pynshisha ïa ki jingkheiñ lyngba ka kam shimet ne ka jingkheiñ na ka third-party halor ki jingtreikam jong ka.
Ha kawei ka liang ka tnat kan long ha ka jaka kaba biang ban jubab lada ïa kane ka kaiphod ba la ïalam bakla la ïoh ka jingpynshisha ne ban pynpaw pyrthei.
Lada ha baroh kino kino ki jingbakla ha ka jingkheiñ la ïohi, ïa kane kajuh ruh la pynshai kham kloi katba lah, u la bynrap.
U Razi u la ong ba kan long ka jingai burom ba ha ka por ba la plie ïa ka JJM ha ka 15 tarik u Nailar 2019, dang don tang 4550 ki longïing kiba la ïoh um lyngba ki Functional Household Tap Connections (FHTCs) hynrei kane ka jingbun ki longïing kumba long ha ka 5 tarik u Nailur 2024 ka la kiew haduh 5,24,477 tylli.
“Kane ka project la lah ban pyntreikam da kaba sted bad ha ka por ruh kaba dei kumba la buh wat hapdeng ki jingeh kiba bun halor ka project. Lada kino kino ki mat ka PHE ka don ban pynbeit mardor ban pynshai halor kine ki jingeh,” u la bynrap.
U la ong shuh shuh ba ka tnat ka pynthikna ïa ki paidbah ka Meghalaya ba ka tnat kan ym ailad ïa ki jingleh bym dei khnang ba ka jingpyntreikam ïa kane ka projek kan long kaba jop ha baroh kawei ka jylla.
“Lada ki mih kino kino ki jingeh halor kane ka skhim ki nongshong shnong ki lah ban pyntip sha ki ophisar ka tnat PHE ne sha ki Village Water and Sanitation Committee (VWSC) jong ki shnong. Ki nongshong shnong ki don ruh ka lad ban ujor ïa ki jingeh jong ki lyngba ka CM Connect bad ka tnat PHE ka long kaba kloi ban pynbeit ïa kine ki kam,” bynrap u Razi.
