Dei ban hikai lang ïa ka ktien Khasi bad Garo ïa ki khynnah ba hapoh Class-V: CM

Shillong, Nailur 05 : Ki khynnah skul ha rilum Garo ki dei ban nang malu mala ïa ka Ktien Khasi bad ki khynnah skul ha rilum Khasi ruh ki donkam ban nang ne sngewthuh katto katne ïa ka ktien Garo, ong u Myntri Rangbah ka Jylla, Conrad K Sangma haba kren ha ka jingïalang rakhe ïa ka Teacher’s Day ha kane ka sngi Palei ha Soso Tham Auditorium, Shillong.
Haba kren kum u Kongsan ha kane ka sngi, u Myntri Rangbah u la ong, “Nga kwah ban ïohi ba haduh klas 5 kumba kdew ha ka National Education Policy, ngi donkam ban kyntiew ïa ki ktien tynrai lajong. Balei ngim lah, ba man u khynnah skul ha rilum Garo un pyrshang ban nang ïa ka Ktien Khasi haduh klas 5. Bad kumjuh ki khynnah skul na rilum Khasi -Jaintia ki dei ban hikai ïa ka ktien Garo haduh klas 5. Nga sngew ba donkam ban sdang noh ïa kane namar kane ka rta kadei kaba paka tam ban sdang bad nang kham kloi,” u la ong.
Da kaba kubur ba nyngkong kan don ka jingeh khamtam haba ïadei bad ki nonghikai kumno ban leh hynrei u ong pat ba donkam ban leh ïa kane na bynta ka jylla bad katkum ka NEP.
U Myntri Rangbah u ong ruh ba da kaba leh kumne kumne man uwei pa uwei u khynnah ha ka jylla haduh ka klas 5 un sngewthuh bad nang katto katne ïa ka Ktien Khasi kumjuh ïa ka Ktien Garo kiba dei ki ktien tynrai ha ka jylla Meghalaya.
Da kaba bynrap ba kane ka sienjam ym tang ba ka ïarap ïa kito kiba kren Khasi ban sngewthuh bad nang ïa ka ktien Garo bad kiba nang ïa ka ktien Garo ban nang bad sngewthuh lang ïa ka ktien Khasi, u Myntri Rangbah u ong ruh ba ka long ka burom haba ki nongshong shnong ka jylla ki nang bad sngewthuh ïa ki ktien lajong kiba don ha ka jylla.
Kumta, u ong ba kane kadei ka mat kaba hakhmat eh kaba u kwah ban ïohi ba ka tnad Pule Puthi kan shimkhia bad pynleit jingmut khnang ba kan ïoh ban sdang noh watla kam dei eh ban leh lut shisien leh.
Ha kajuh ka por, u ong ruh ba la donkam ban don ki kynja khusnam ïa ki skul katkum ka jinglah jong ki. Ym tang katta u ong ruh ba donkam ba kito ki skul kiba kham paw kin ïarap bad ïa sam lang ïa ki jingtbit bad kito ki skul kiba dang kham duna khnang ba kin lah ban kiew lang ha ki jingpule.
“Kawei pat nga kwah ban pynshlur ïa ki skul ba don ha ka jylla ba ki skul na kawei ka distrik kum na Baghmara kin leit pynlut 5 sngi ne shi taiew sha Khliehriat khnang ba kin lap bad ïohi ïa ka rukom im, ka kolshor bad ka jinglong jingman ha kato ka jaka da kaba khleh lang bad ki samla pule na kato ka jaka. Bad balei ngim lah ban don ki khynnah skul na Mairang ban leit sha Resubelpara bad pynlut por hangtei ban wad bniah bad ïohi ïa ka rukom hikai, ka jinglong jingman ha kato ka jaka,” la bynrap shuh shuh u Myntri Rangbah.
“Nga pynshlur ba dei ban leh kum kine khnang ba ki khynnah kin ïohi lang ïa kaei kaba don shabar na ka thaiñ jong ki khnang ba kan ïarap ïa ki ban pynrung ïa ka mynsiem ïakhun ha ki.” Shuh shuh u ong ba da kaba leh kumne kan ai mynsiem bad pynshlur shuh shuh wat ïa ki nonghikai ban leh khambha shuh shuh ha ka jingshakri jong ki.
Ha shwa kane, u Myntri ka tnad, u Rakkam A Sangma u la ong ba naduh u snem ban wan ka sorkar jylla ka thmu ban phah la kumno kumno 10 -15 ngut ki khynnah skul sha United Kingdom khnang ba kin lah ban ïohi bad tip kham bun shuh shuh na ki skul kiba don shabar ka ri.