Shillong, Nohprah 01: Ka Meghalaya College Teachers Association (MCTA) ka la ujor sha u Commissioner and Secretary to the Government of Meghalaya, Education Department halor ka jingleh ki katto katne ki ophisar na ka tnad Directorate of Higher and Technical Education kiba la byrngem ïa ki katto katne ki Principal jong ki College ha jylla.
Katkum ka jingujor ba la phah da ka President jong ka MCTA, ka Dr. (Ms) BH Buam, la ong ba ki don ki ophisar jong ka DHTE kiba ai hukum bad byrngem da ka ktien ïa ki katto katne ki Principal bad ki nonghikai ba la shongthait, kaba long ka jingleh ka bym shongnia satia bad kadei ban pynrem jur.
“Ka jingbyrngem da ka ktien kadei ka jingleh buit tuh khnang ban lait na kino kino ki jingeh hadien habud”, la ong ka MCTA.
Ka Seng ki Nonghikai College ka ong ba dang shen ka Supreme Court jong ka ri India ha ka 23.8.2022, ka la hukum ïa ka sorkar Meghalaya ban siew ïa ka state government allowance sha ki nonghikai deficit kiba ïoh tulop na ka UGC bad ka jingsiew yn kheiñ naduh ka 01.01.2018. Halor kane ka hukum jong ka ïingbishar, ka DHTE lyngba ka shithi kaba 28.09.2022 ka la phah ïa kane ka hukum jong ka Education Department kaba 26.09.2022 sha ki Principal jong ki Deficit College ba kin kheiñ allowance kaba dang sah haduh u Nailur mynta ka snem bad ban pynpoi hapoh ka 15 tarik u Risaw 2022.
Katkum kane ka shithi ka paw shai kane ka allowance kadei ban rung lang ha ka tulop jong ki nonghikai naduh u bnai Risaw 2022. Ka MCTA ka la ïoh jingtip ruh ba ki Principal ki la long kiba la kloi ban pyntreikam ïa kane ka jingbthah ka DHTE. Hynrei ka long kaba kyndit ba don ki ophisar jong ka DHTE hi kiba la phone sha ki Principal ba ym dei ban siew ïa kane ka allowance jong ki nonghikai. Nalorlata ki la ong ruh ïa ki Principal ba kito kiba pyntreikam ban siew ïa kane ka allowance ïa ka grant na ka sorkar jylla ïa ka tulop ki nonghikai yn nym siew ne pyllait satia.
Ka MCTA ka ong ba kane ka jingleh ki ophisar ka pynkheiñ lut ïa ka jingtreikam ha ka jingshakri paidbah. “Kumno ka sorkar kan treikam da ka jingbthah ktien?”, la ong ka kkyrwoh na ka MCTA, da kaba bynrap ba kane ka jingbthah kaba khlem da ai jingthoh kadei ka buit ban pyndik ïa ki Principal bad ïa ki nonghikai. Nalorkata ka pynhiar kyrdan ruh ïa ki Princilal bad ïa ka jingtreikam ki College.
Na ka liang ka Seng ki Nonghikai College ka ong ba kane ka jingleh ki ophisar ka DHTE kadei ka jingïaleh pyrshah ïaka hukum jong ka Supreme Court bad na ka liang jong ki, ki lah ban ujor sha ka ïingbishar.
Kumta ka kyntu ïa u Commissioner and Secretary ba un peit ïa kane ka jingleh ki ophisar ba hapoh jong u, kaba ktah ïa ka burom jong ka tnad pule puthi ha ka jylla.
