Shillong, Naiwieng 30 : U Symbud Myntri Rangbah ka jylla u bah Pretone Tynsong ula ong ba ka jingkhot hajir jongka ïing bishar ba kyrpang ka National Investigation Agency (NIA) ïa ki nongïalam ka seng HNLC kan ym don jingkthah ïa ka jingkren ïasuk namar tang shu ïa kynduh biang nangne ïa kane ka mat yn sa ïa kren ïa pynbeit bad ka sorkar pdeng.
“ Ngi tang shu ïa kynduh nangne ha kawei ka jingïalang ngin sa ïakren ïa kane ka kam bad ka sorkar pdeng ban weng ïa kine ki jingpynngat kyndon ïa ki nongïalam ne ïa baroh ki dkhot ka seng HNLC” ong u Symbud Myntri Rangbah.
U la ong ba kam lah ban long ba kane kan ktah ïa ka jingkren ïasuk namar ka sorkar ka shim khia ïakane ka kam bad kan ïakren bad ka sorkar pdeng ban pynsangeh ïa kine ki jingkhot hajir namar ka jingkren ïasuk ka la ïaid shakhmat. “
“ Ka sorkar ka thrang ban pyndep ïa kane ka jingkren ïasuk bad wanrah ïa ka shongsuk shongsaiñ ha ka jylla bad dei na kata ka daw ba la ïadon bynta lang da ki nongmihkhmat na ka sorkar pdeng, sorkar jylla bad na ki nongïalam ka seng HNLC” ong u biang u Symbud Myntri Rangbah.
Lah ban pynkynmaw ba ha ka 30 tarik u Naiwieng 2022 ka ïing bishar ba kyrpang ka NIA ka la khot hajir ïa ki nongïalam ka seng HNLC kiba kynthup ïa u bah Bobby Marwein, bah Marius Rynjah bad bah Sainkupar Nongtraw halor ki jingjia bthei bom ha East Jaintia Hills ha u snem 2020. La bthah ba ki dei ban wan hajir hakhmat ka NIA ha ka 4 tarik u Kyllalyngkot 2023.
Hynrei na ka liang u Symbud Myntri Rangbah u la ong ba ïa kane ka kam yn sa ïa pynbeit bad ka sorkar pdeng ban pynsangeh ïa baorh ki case ba la rejister pyrshah ïa ki nongïalam ka seng HNLC bad ki dkhot jongka namar ka jingkren ïasuk ka la ïaid shakhmat.
