La hukum ïa ki Pulit kim dei da lei lei ban siat ïa ki briew ong u CM ka Assam

Shillong, Nohprah 1 : U Myntri Rangbah ka Assam u Himanta Biswa Sarma ha ka Sngi Balang u la ong ba u la dep hukum ïa ki pulit jongka Assam ba kim dei da lei lei ruh ban siat ïa ki briew la ki dei ki nong Meghalaya ne ki nong Assam ruh.
“Ki pulit kim dei ban pyndonkam ïa ki suloi jongki pyrshah ïaki riew paidbah bad nga la bthah bad hukum ïaki pulit ka Assam ba kim bit da lei lei ruh ban siat ïa ki riew paidbah” ong u Himanta.
ïa kane u la kren halor ka jingshah siat iap ki hynriew ngut ki mynsiem briew ha ka 22 tarik Naiwieng ha Mukroh ha ki pulit jongka Assam.
Halor u pud u sam ka Meghalaya bad Assam u Himanta ula ong “U don u pud u sam jong ka Meghalaya bad Assam kat kum ka Riti Synshar jong ka ri hi. Baroh ar ki jylla ki donkam ban bud bad burom ïa u pud u sam . Na ka daw jongka histori jong ki jaka ka Meghalaya ka kwah ban ïakren halor ka Block A bad B bad baroh ar ki sorkar jylla ki la mynjur bad ki la dep thung ruh ïa ki Regional Committee ban ïakren halor kane ka kam bad nga ngeit skhem ngin sa lah ban pynbeit da ka jingïakren sngewthuh jingmut” ong biang u Himanta.