Ujor Ejahar ka VPP ïa u Rakkam ba kynnoh kren pynshit jaitbynriew ha ka jingïalap ilekshon

By Mawphor Editor On Jun 19, 2024

Shillong, Jylliew 18: Ka Voice of the People Party (VPP) kaba don ha ka liang pyrshah ka la ujor da ka Ejahar ne first information report (FIR) pyrshah ïa u Myntri ka sorkar uba dei na ka seng NPP kaba la ïalam ïa ka sorkar Meghalaya Democratic Alliance u Rakkam A Sangma halor ka jingkynnoh ba u la kren ki kyntien pynshit ne isih jaitbynriew ne ka “hate speech” ha ki por ba u la ïalap ïa ka ilekshon Lok Sabha.
Ïa kane ka FIR la ujor da u VPP finance secretary u Bah Danny Langstieh ha kaba la aiti sha u Superintendent of Police (SP), ka East Khasi Hills District ha ka sngi baar.
U Bah Langstieh u la kynnoh ba ha shwa ka jingpynlong ïa ka Member of Parliament election, 2024, ka la don ka video clip kaba la saphriang ha kaba la ïohi bad ïohsngew ba u Myntri ha ka por ba ïalap ilekshon ne ka rally ne ka jingialang u la kren ïa ki kyntien ba la kynnoh beit pyrshah ïa ka VPP bad kane ka jingkynnoh ka long ba kane ka party kan pynjot, pynïap, kan ñion bad pynjah noh ïa kawei ka jaitbynriew bad kane ka long kaba bakla jur, ka bym shisha bad ka bym dei.
“Haba kren ïa kum kine ki bym don jingkitkhlieh, ba pynshit bad isih ym tang ba kadei kaba bakla bad kaba beaiñ hynrei ka long ruh kaba ma naba kan ïalam sha ka jingbym shongsuk shongshngaiñ bad ka lad ban lam sha ka jingïashrut jaitbynriew, bad jingïaumsnam,” u la ong ha ka FIR.
Haba phai sha ka jingbishar ka Supreme Court of India haba ïadei bad ki kyntien wanrah jingisih, u Bah Langstieh u la ong, “Ha ka hukum kaba dangshen halor ka mukotduma jong Ashwini Kumar Upadhyay vrs Union of India & Ors, ka Supreme Court ka la pynpaw ba lada ka don kano kano ka jingkren isih ha kano kano ka jaka bad kano kano ka jingleh ka ban lam sha ka jingpynkheiñ ïa ki kyndon 153A, 153B bad 295A bad 505 jong ka IPC etc, dei ban shim kam suo motu ban register case watla kam shym la don ka jingmudui hynrei ka jingshim kam katkum ka aiñ kan ïaid.”
“Hynrei watla kam don ka jingshim kam naphi ïa ka tarik ba la pynmih ïa kane ka kyntien isih, manga kum u nongshong shnong ba don jingkitkhlieh bad u dkhot ka VPP nga kyrpad jur ïa phi ban leh ïa kaba donkam pyrshah ïa u Myntri sorkar mardor bad shuh shuh nga kwah ban kdew ba ha kajuh ka case, ka Supreme Court ka la pynkut ba lada ka don kano kano ka jingbym leh eiei katkum ba la bthah, yn kheiñ kum ka contempt of Court bad yn shim kam kylla pyrshah ïa ki ophisar kiba leh bym suitñiew ia kane ka kam,” u la bynrap.
Shuh shuh u nongïalam ka VPP u la ong ba ka long ka sakhi ba ka jingkren ba la kren da u Myntri myntri ki long kaba pynshit bad kiba aiding ban kyntiew, pynshlur, bad ka jingïasih hapdeng ki kynhun riewlum ne regional group bad ki jaitbynriew hapoh ka jylla Meghalaya bad ka jingbym shonghok ban pynneh ïa ka jingsngew shipara hapdeng ki kynhun bapher bapher bad kan ktah ïa ka jinglong bajai jai jong ki paidbah.
“Namar kata nga kwah ban wanrah ïa ka jingshim khia jong phi halor kine ki jingkren ba pynshit, ban kyntu ïaphi ban shim da ka kam kaba tyngeh, bad ba uba pynkheiñ udei ban shah pynshitom katkum ki kyndon hapoh ka 153A, 153B bad 505 jong ka IPC bad kiwei pat ki kyndon kiba don jingïadei bad ka aiñ,” u la dawa.
U Rakkam A Sangma, u ba bat ïa ka kam ka tnat Pule Puthi, ka Border Areas Development department bad ka General Administration department, ha ka sngi nyngkong u la kyntait ba u la kren ïa ki kyntien ba pynshit jaitbynriew ha ka jingïalap ilekshon ha Garo Hills.