Shillong, Nailar 26: U Samla Marking Gulf Lyngdoh Langrin, uba la ïadon bynta ban ïakhih pyrshah Uranium naduh ba u dang 7 snem ka rta, mynta u la pynkhreh ban mih madan ban ïa ai reng ha ka elekshon MLA na Raninor ha u snem 2023.
U Samla Marking 27 snem ka rta, u dei na ka Shnong Wahakaji, u la pyndep ïa ka BA, nangta ïa ka ITI bad kiwei kiwei de ki kam bad mynta u treikam la jong. Udei u khun jong i Bah Tenderson Myrthong bad Kong Delbidaris Lyngdoh Langrin.
Kum u briew uba la mad ïa ki jingeh naduh ba u dang rit ban trei ha ki karkhana moramot kali bad ka leit pule artad, u Marking u angnud ban trei shitom ban ïakhun pyrshah ïa u MLA ba mynta u Bah Pius Marweiñ bad ïa u MLA barim, u Martin Danggo.
Haba ïakren bad u Mawphor, u Marking, u la ïathuh ba ha ka por ba u dang 7 snem ka rta u la leit bud ïa ki hymmen jong sha Domïasiat ha ka por ba u Bah Hoping Stone Lyngdoh u la leit ïakynduh ïa i Meiieid Spility Lyngdoh Langrin ban ïakren halor ka jingpyrshah Uranium. “Ka ïing ka sem jong ngi, kadei ka ïing kaba la ïeng skhem ha ka jingpyrshah Uranium”, u la ong, da kaba pynkynmaw ba kumno kum ka ïing ryngkat ki nongïalam KSU ki la ïeng rangbah ha ka por ba jur bha ka jingpynbor tih Uranium ha ka por ba long CEM u Bah HS Shylla.
“Ngi la shah byrngem, ngi la shah thombor, hynrei ngim shym la kynran dien ban ïeng ha ka nongrim ban nym shah da lei lei ïa ka jingtih Uranium”, u la ïathuh.
U la ïathuh ba hadien ba u la Samla u la long u dkhot jong ka Seng KSU bad u la bat ruh kum u Nongkitkam ha ka KSU South West Khasi Hills District ha ka por ba long President u Bah Samuel Jyrwa ïa ka KSU. Nangta u la long ruh kum uwei na ki Nongkitkam ka Langrin Youth Welfare Association (LYWA) ka Seng kaba la ïeng lang bad ka KSU ban pyrshah ïa ka jingtih Uranium.
Une u Samla um pat shym la pynpaw na kane ka Party
