U Dy. CM ha Tyrsad bad u Bah Banteidor ha Thynroit ka shnong ba paw ha ka sumar tynrai
Ar tylli shi sngi kyntiew kyrdan ïa ki Sub Centre sha ka PHC

Shillong, Risaw 11 : Mynta ka sngi ka sorkar MDA lyngba ka tnad ka koit ka khiah ka la kyntiew kyrdan ïa ki ar tylli ki Sub Centre sha ka kyrdan Primary Health Centre. Kawei ha Tyrsad bad kawei ha Thynroit.
ïa ka Sub Centre ha Tyrsad la plie ïa u maw nongrim ban kyntiew kyrdan PHC da u Symbud Myntri Rangbah ka jylla u bah Prestone Tynsong ha ka jingïadon lang u MLA bah Eugeneson Lyngdoh bad ïa ka Sub Centre ha Thynroit la plie da u bah Banteidor Lyngdoh myntri ka tnad kam rep kam riang bad kam sport ha ka jingïadon lang u MDC bah M.N Mukhim.
Haba kren ha ka jingïalang kyntiew kyrdan PHC ïa ka Tyrsad Sub Centre u Symbud Myntri Rangbah u la ong “ Da kane ka jingkyntiew kyrdan ïa kane ka Sub Centre sha ka PHC ki briew jongka Tyrsad bad ki shnong ba marjan kin ïoh jingmyntoi shi katdei eh namar ki la nang ïoh ïa ka jaka sumar kaba biang. Nga khot bad ïawer ïaki paidbah ban ïatrei lang bad ka sorkar khnang ba yn dang lah ban kyntiew shuh shuh ïa ka koit ka khiah namar ka sorkar ka buh ba ka koit ka khiah ka dei kawei na ki mat treikam ba hakhmat jongka. U la ïathuh ba dei ruh na kata ka daw ba ka sorkar ka kyntiew kyrdan ïa baroh ki jaka sumar ha ka jylla ym tang na ki Sub Centre sha ki PHC hynrei wat ki PHC sha ki CHC ruh khnang ba ki paidbah kim donkam ban ïa kiew than tang shane sha sor Shillong namar ha shnong ne mar jan shnong jongki ruh ki la ïoh ïa ki jingsumar kiba biang”.
U kyrmen ruh ba lyngba kane, ki paidbah kin ïoh ki jingkyrkhu ha la liang ki lad jingsumar ha ka koit ka khiah kaba kham biang.
Ha kaba iadei bad ka Thynroit Sub Centre sha ka PHC, lah ban pynkynmaw ba ka shnong Thynroit, kaba hap ha Mawkynrew C&RD Block kaba paw bha ha ka jingdon ïa ki nongsumar ba tbit da ka jingstad tynrai bad ki dawai kynbat, ka la sakhi ïa ka jingwan buh maw nongrim ban kyntiew kyrdan noh ïa ka Thynroit Sub Centre sha ka Primary Health Centre bad kumjuh ruh ka jingplie ïa ka ïing skul ba thymmai jong ka Thynroit Government LP School da u Bah Banteidor Lyngdoh, MLA ka Mawkynrew Constituency uba dei ruh u Myntri ba dei khmih ia ka tnad kam rep bad kam ïalehkai ka Sorkar Jylla.
Kane ka Sub Centre ka dei kaba la plie naduh u snem 1981 bad kat nang ïaid ki sngi ka jingai jingshakri jong ka sha kiba pang ba shitom kam kot bor shuh watla ka dei kawei na ki jaka ai jingsumar ba tbit bha ba la ïoh jingithuh bha da ka Sorkar Jylla bad Sorkar India kumjuh. Halor kane ka jingeh, u MLA u la shim ïa ka sienjam ban kyntiew kyrdan PHC noh ïa kane ka Sub Centre bad shen yn tei ïa ka ha ka jaka kaba heh kumba 3 acre tam ha katei ka shnong.
ïa kane ka PHC yn tei ha ka mang tyngka kaba la jan kot 10 klur tyngka bad kan long ka jingkyrkhu ïa ki nongshong ym tang na Thynroit hynrei ki shnong kiba marjan kiba la la nang roi nang heh ha ka jingbun paid kat nang mih ki sngi ki snem. Katba ïa ka skul pat kaba la kylla dur na kaba long mynshwa kaba la don ruh 70 snem ka rta ha katei ka shnong la tei ha ka mang tyngka kaba long 37 lak.
Ha ka jingïalang plie ïa u mawnongrim ban kyntiew kyrdan ïa ka Sub Centre kumjuh ïa ka jingplie ïa ka ïing skul la ïa donlang da u Bah Martle N Mukhim, MDC Mawkynrew, u Bah Medhistar Warbah, MLA barim ka Dienglieng Constituency, Dr A Lyngdoh, DMHO East Khasi Hills, u Dr Shaji ML, Principal ka Good Shepherd Higher Secondary School, Jongksha, u Dr AK Nongbri, Dr incharge Jongksha PHC, u Bah Harkin Warjri, Sordar Thynroit, u Bah Olet Kharsahnoh, Sordar Jongksha, ki nonghikai bad khynnah skul ka Thynroit Government LP School, ki nongshong shnong nalor kiwei pat.
Haba kren ha ka jingïalang, u Bah Banteidor da kaba pynkynmaw ïa ki por ba la leit u la ong, “Ki nongshong shnong khamtam ki longkmie ki la pynsngew na ka por sha ka por ïa ka jingdonkam ban kyntiew kyrdan PHC noh ïa kane ka Sub Centre bad mynta ka la urlong ha kaba shen yn tei noh ïa ka bad kan dei ka jingkyrkhu ïa ki nongshong shnong kiba donkam ïa ka jingsumar ha ka pang ka shitom”.
U la ong ba kane ka Centre ka dei kawei kaba la ju ïoh khusnam na ka por sha ka por bad kane ka dei ka kynti ban ïoh kyntiew kyrdan PHC nalor kiwei pat ki kyndon. “Kane ka dei ka jingdonkam kaba la angnud da ki nongshong shnong bad ka dei ka jingïatreilang jong ki bor shnong, ki nongshong shnong bad ka tnad ka koit ka khiah ba kane ka jingangnud ka la urlong”, u la ong da kaba bynrap ba kane ka PHC kam dei tang u mawnongrim hynrei la pynthikna ban tei noh noh ïa ka.
Da kaba pynpaw ba ka Shnong Thynroit ka paw nam na ka daw ka jingdon ki riewdonsap tynrai ban sumar ïa kiba shitom ba pang khamtam kiba kdiah shyieng da ki kynbat, u la ong ba ka surok sha kane ka shnong mynta ruh ka la kylla dur na kaba long mynshwa bad ki nongwan wad jingsumar ha ki snem ba la dep ki ju ud ïa ka jingsniew ka surok hynrei mynta pat ka shim por tang da ki minit ban ïaid na Smit ne Thansning sha Thynroit.
Halor ka skul, u la ong ba ki paidbah ki kynmaw mynshwa ïa ka long ka man ka skul bad lada ki ïa nujor mynta ka la pher bak-ly- bak. “Mynshwa kim kwah wan skul shuh bad u Sordar u la pynsngew ïa kane ruh bad kumta mynta ngi la ïoh ïa ka building ba thymmai”, u la ong da kaba bynrap ba ka rukom ai jinghikai kan nang kiew nangne sha khmat ha kane ka skul.