Hapoh 3 bnai yn bun ki ïing ban ïoh um kor ha ïing buh thong u Myntri ka PHE

0

Shillong, Risaw, 11: U Myntri ka tnat Public Health Engineering (PHE) u Bah Renikton Tongkhar ha ka sngi Baar u la kular ba ka tnat kan sa leh ïa ka bynta kaba khraw ban pynthikna ban pynpoi ïa ka umkor sha ki longïing hapoh ka Jal Jeevan Mission (JJM) ha ki lai bnai ban sa wan.
Hadien ba la bishar bniah ïa ka jingpyntreikam ïa ka JJM ha Meghalaya, u Bah Tongkhar u la ïathuh sha ki lad pathai khubor ba ka thong ban pyndep ïa kane ka mishon ka long haduh u bnai Nohprah mynta u snem bad haduh mnynta ka jylla ka la tam 40% ban pynpoi ïa ka um kor sha ki shnong nongkyndong.
“Ngi khlem pat weng na ka jingmareh thong bad kumba nga la ïathuh ïa phi ngi la kyntiew ïa ka jingdon jong ki longïing ban ïoh um kor bad kane ka dei kawei na ki daw kaba ngim pat lah ban kynjoh sha ka 100% hynrei ngin ïai pyrshang ban leh ïa kaba bha tam ban pyndep ïa ka thong ha kaba kut jong u Nohprah,” u la ong.
U Bah Tongkhar u la ïathuh ba katkum ka thong ba la buh la kyntiew shuh shuh na ka 5.89 lak tylli ki longing sha ka 6.30 lak tylli ki longing.
“Na ki 5.89 lak tylli ki longing ngi la lah ban mang pisa na ka bynta ban pynpoi ïa ka um kor haduh 5.62 lak tylli ki longing,” u la ong.
Haduh mynta, ki don 1400 tylli ki shnong kiba la ïoh ïa ka um kor shi spah na ka shispah ha ki shnong nongkyndong lyngba ka JJM.
Katkum ka jingïathuh jong u Bah Tongkhar, T.1,600 kular ladep pynlut na ka bynta ban pyntreikam ïa ka skhim JJM ha kane ka jylla.
Haba ïathuh ba ka jylla Meghalaya dang shen ka la ïoh ïa ka khusnam ba lah ban pyntreikam bha ïa ka skhim JJM, u Bah Tongkhar u la ong, watla ki Engineer bad ki Ophisar jong ka tnat ki la trei shitom ban ai ïa kaba bha tam hynrei ka dang don pat ka lynti ban nang leh bha shuh shuh.
“Ha ka review meeting ngi la kyrpad ïa ki Engineer bad ïa ki Ophisar ba kin ai jingmut khnang ban pynjanai ïa kane ka kam khnang ba kan wanrah ïa ka jingjop jong ka tnat PHE ha kaba pyntreikam ïa ka skhim JJM. Ka jingïakren ka la long kaba seisoh bad ban wad ruh ïa ki lad ki lynti kba ïadei bad ka jingpynslem ban siew ïa ka pisa sha ki Kontraktor,” u la ong.
U la ïathuh ba ka ki Engineer ki la pynpaw ka jingsngewkhia halor ka jingslem ban phah ïa ka kaiphod sorjamin. “Ngi la bthah ïa u Chief Engineer ban ïakynduh ïa ki kontraktor khnang ban sngewthuh ïa ka jingeh ba ki la ïakynduh bad ngi khmihlynti ban weng noh a kane ka jingeh kham kloi.”
U la ïathuh ruh lyngba ka jingai jingbit jong ka Sorkar Pdeng la pynpoi ïa ka skhim JJM sha ki 9 tylli ki Census Town bad dei na kane ka daw ba ka jingdon jong ki longing ban ïoh ïa ka um kor ka la kynjoh sha ka 6.30 lakh.
Ha kajuh ka por, u Bah Tongkhar u la pynsngew sha ka Sorkar Pdeng ha kaba ïadei bad ka jingdonkam kyrkieh ban ïada ïa ki tyllong um kiba la sdang ban ring tyrkhong.
“Ki la don ki trai jaka kiba la wan shakhmat bad pynpaw ïa ka mon ban ai jaka lada ka sorkar ka kwah khnang ban ïada ïa ki tyllong um,” ula ong.

Leave A Reply

Your email address will not be published.