U don ka rynïeng kaba lyngkot hynrei ka dohnud kaba heh ban shakri ïa ki paidbah ka Jirang

Nongpoh, Rymphang, 16: U Myntri Rangbah ka jylla u Conrad K Sangma ba dei ruh u National President ka NPP hynnin ka sngi u la hiar hi dalade sha ka shnong Maikhuli bad Umpher jong ka Jirang Constituency ban leit pan ka jingkyrshan na ka bynta u kyrtong MDC ka NPP ha Jirang u Bah Sosthenes Sohtun.
Ha katei ka sngi ka jinghiar u Conrad Sangma ban leit ïalap elekshon na ka bynta u Bah Sosthenes Sohtun la sakhi ruh da ka jingdonlang ki nongïalam ka party na Jirang, na Ri-Bhoi bad ka jylla hi baroh kawei lem bad ki paidbah nongkyrshan.
Haba kren ha kitei ki ar tylli ki jingïalang ba la long ha Maikhuli bad Umpher u Conrad K Sangma u la pynpaw ba u Bah Sosthenes Sohtun MLA ka Jirang u ba dei ruh u kyrtong MDC ha kane ka kynti ba mynta un jop don burom namar ba ki paidbah ki sakhi ïa ka jinglong u briew bad ki kam kiba u trei, namar haka jinglong MLA jong u, u dei uwei na ki MLA ba wanrah shibun ki kam pynroi bad lada un long sa u MDC ka Jirang kala dei lypa kawei na ki constituency kaba la kyrkhu.
U Conrad u la ong ruh ba um artatien ba ka NPP kan thaw biang ïa ka EC ha KHADC, JHADC bad wat ha rilum Garo namar ha ka kane ka kynti ba mynta ka NPP kan synshar marwei ha kitei ki ADC.
“Wat sngewthuh bakla ïa ka rynieng jong u Bah Sosthenes Sohtun u dei u briew ba lyngkot hynrei u don ka dohnud kaba heh, kaba iar, u ba don ka jinglen lade ban trei shitom, ban shakri ïa ki paidbah ka Jirang bad dei namar kata ha kine ki 6 ne 7 snem ba la leit noh hapdeng shibun ki jingeh, bun ki kam pynroi ki la poi namar ka jingshemphang jong u kum u nongïalam watla ki dang don shibun ki kam kiba u dang hap ban trei” la ong u Conrad da kaba bynrap ruh wat hapdeng shibun ki jingeh, haba nujor bad ki MLA ba la leit noh ki kam pynroi bun shah ki poi ha Jirang dei haka jinglong u Bah Sosthenes Sohtun kum u MLA.
Namarkata u Conrad Sangma u la kyrpad ïa ki paidbah ban ïatylli ban kyrshan tyngeh ïa u Bah Sosthenes Sohtun ban long kum u MDC ka Jirang namar kan long ka kabu ba ki skhim na ka sorkar bad kumjuh ruh na District Council kin tuid sha Jirang Constituency.
U Bah Sosthenes Sohtun haba kren ha katei ka sngi u la pan ka jingkyrshan na ki paidbah ka Jirang Constituency namar u don ka jingangnud ban pynkhlaiñ ki Dorbar Shnong, ki Hima bad ki riti ki dustur namar ki paidbah ki tip shai ba haka jinglong MLA jong u, u la lah ban leh shibun ki kam kiba khraw ban wanrah ki kam pynroi hapoh ka constituency bad mynta ka kynti ka dei ka kabu lada ki paidbah ki ailad ïa u ban long u nongmihkhmat sa ha District Council.