Guwahati, Jymmang 03: Ka Assam Royal Global University (RGU) da ka jingsarong ka la pynbna ba u S. Ramadorai, CEO bad MD barim ka Tata bad uba la tip ha kylleng ka pyrthei kum u riewshem phang ha ka IT bad education, u la pynïasoh bad ka Governing Board kum u dkhot ba kyrpang. Kane ka jingpynïasoh jong u ka la nang pynkhlaiñ ïa ka jingangnud jong ka RGU ban wanrah ïa ki kam kiba thymmai, ban pynïar ïa ka pule puthi, ban pynkup bor ïa ki samla ka jylla Assam bad kumjuh ruh ban pynïar ïa ki jingtreikam sha kane ka thaiñ shatei lammihngi ban pynsted ha ka ïoh ka kot ha ka pyrthei baroh kawei.
“Nga sngewbha ban pynïasoh bad ka Assam Royal Global University ha ka por ba ka Northeast ka la paw ha kaba ïadei bad ki jingkiew ha ki sap ki phong bad ki lad ki lynti,” ong u S. Ramadorai. “Ka University ka buh ïa ka thong ban pynïar ïa ka pule puthi bad ban pynïar ïa ki jingshem kiba thymmai kiba don ruh ka jingïadei bad ki jingangnud jong kane ka thaiñ. Nga khmih lynti ban ai ka jingkyrshan ïa ki kam ba ïadei bad ki jaka pule kiba la long kiba la khreh na ka bynta ka lawei bad kumjuh ruh ban pynkup bor ïa ki samla jong ka Assam bad kumjuh ruh ki jylla kane ka thaiñ shatei lammihngi.”
“Ngi dap da ka jingkmen kaba khraw ban pdiang sngewbha ïa u S. Ramadorai sha ka Governing Board jong ngi,” ong u Dr. A.K. Pansari, Chancellor ka The Assam Royal Global University. “Ki jingïohi jngai jong u kum u nong’alam bad ki jingshem phang jong u ha ka pule puthi kan ïarap ban ai mynsiem ïa ngi ban kynjoh sha ki kam kiba shalor ban pynwandur ïa ka lawei jong ki samla pule jong kane ka thaiñ shatei lammihngi.”
U S. Ramadorai ha ki jingshemphang jong u, u la noh synniang hapoh ka India IT industry bad ki skill development. Kum u CEO bad MD barim ka TCS, u la long uba donkti ban thaw ïa ka company jong ka global IT bad u la long ruh u nongïalam halor kane ka bynta. U la shakri ruh kum u Adviser u Myntri Rangbah duh ka ri hapoh ka National Council on Skill Development.
Hadien ba la thaw hapoh ka Assam Royal Global University Act, 2013, bad ba la ithuh da ka University Grants Commission (UGC), ka Assam Royal Global University (RGU) kadei ka jaka pule kaba la paw kaba don ha Guwahati, Assam. Da ka jingïaid lynti kaba la palat 23 snem ha ka jingshakri ha ka pule puthi, ka RGU ka la aiti ban pynïoh ïa ka pule puthi kaba paw ha ka pyrthei. Kane ka University ka tyrwa ïa palat 100 ki kam pule ha ki undergraduate bad postgraduate program ki ban ïarap ban tei ïa ka lawei ki samla pule ha ka ïohkam ïohjam, ba kyntup ruh ha ka kam engineering, management, law, architecture, health sciences, humanities, social sciences, bad kiwei. Kane ka University ka don kumba 500 ngut ki professor bad ki nongialam ka industry kiba hikai ïa ki samla pule ba kin kynjoh sha ka thong.
Ka RGU kaba don ïa ka jaka kaba heh kumba 30 acre tam ka don ïa ki lad ki lynti na ka bynta ki samla pule ba kin pynleit jingmut ha ka pule puthi. Kane ka University ka don ïa kumba 8,500 ngut ki samla pule na ki 7 tylli ki ri ha kylleng jong ka Asia, Africa, bad na kiwei pat ki ri.
Da ka jingïohi jngai jong u S. Ramadorai bad ki kam hikai jong u, ka RGU ka la kiew bha ha ka liang ka pule puthi ha ka India, ka la wanrah ruh ïa kiba bun ki jingkylla ha kane ka thaiñ shatei lammihngi. Ka jingdon jong u ha kane ka jaka pule ka la pynurlong ïa ki kam bad jingthmu jong ka University ban wanrah ïa ka pateng ba lawei jong ki samla pule hadien habud.
